Къабарты-Малкъар къырал эм аграр университетлени эмда орта профессионал билим берген окъуу юйлени студентлерини къаууму – битеу да 50-ден аслам – «Биринчилени китап тарыхлары» деген битеуроссей конкурсунда хорлагъанды. Кёп болмай а Нальчикде Жаш тёлюню юйюнде аланы саугъалау болгъанды.  

– Былтыр бизни специалистибиз Орусбийланы Мадинаны «Биринчилени китап клублары» деген проекти ишин башлагъанды. Бюгюнлюкде республикада аллай тёрт клуб барды. Аланы себепликлери бла кёпле, китап окъугъандан тышында, башхала бла танышыргъа, тюбешиулеге къатышыргъа, заманларын хайырлы ётдюрюрге онг табадыла.

«Биринчилени китап тарыхлары» деген битеуроссей конкурс жаш адамланы арасында эм фахмулуланы ачыкълагъанды, аланы маданиятдан сора да, адабиятдан да ангылаулары болгъанларын кёргюзтгенди. Китап окъургъа сюйгенлени клубуна энтта да иги кесек студент къошулур деп ийнанама, – дегенди жыйылыуда «Биринчилени атламлары» битеуроссей биригиуню регион бёлюмюню таматасыны орунбасары Валерия Баваш.\

Конкурсха къатышханла «Биринчиле» деген темагъа чыгъармачылыкъ иш жазаргъа керек болгъандыла. Анда сынам, жетишим, тюбешиу, жолоучулукъ эм башха затла бла байламлы къуралгъан неда кеслери сынагъан болумла хайырланыргъа керек болгъандыла.

Конкурс былтыр 20 ноябрьден быйыл 30 мартха дери бардырылгъанды. Анга саулай къыралдан 14-25 жыллары болгъанладан 14 минг чакълы бири къатышханды. Ол санда бизни республикадан 200 адам болгъанды.

Хорлагъанлагъа «Читай-город» тюкенледен канцеляр керекле алыргъа сертификатла берилгендиле. Аланы алгъышларгъа Китап клубланы келечилери да келгендиле. Бютюнда Зольск райондан жаш артистле «Гитче къырал» деген номерлери бла къараучуланы кёллерин алгъандыла. 

Андан сора да, Жаш адамланы юйюнде китап тапканы ачылыуу да болгъанды. Мында россейли эм тыш къыраллы жазыучуланы китапларын табаргъа боллукъду. Китапхананы байыкъландырыргъа эм хайырланыргъа да жарайды. 
Эсгертиу: «Биринчилени китап клублары» деген проект былтырдан бери  бардырылады. Бусагъатда аллай клубла Зольск районда, Басхан эмда Нальчик шахарлада бардыла. 

Курданланы Сулейман хазырлагъанды.