Шахардан тышында орналгъан жеринден тепдирилмеген мюлкню эсепге женгил салыу жаны бла жангы жорукъла ишлеп башлагъандыла быйыл. Анга энтта да «дача амнистия» деп алай да айтылады.

КъМР-ни Къурулуш эмда ЖКХ министерствосунда айтханларына кёре, тюрлениуле бу жаны бла аз тюйюлдюле. Энди бу амалны болжалы 2031 жылгъа дери созулады. Аны хайырындан аллай мюлклери болгъанла ишлерин кеч къалмай тындырыргъа боллукъдула.

Программагъа кёбюрек объект тюшгенди. Энди быллай амнистиягъа къуру юйле угъай, гаражла, мюлк мекямла, баняла да киредиле.

Эсепге салыуда да бардыла жангычылыкъла. Энди документлени Росреестрге бара турмай, МФЦ-да неда «Госуслуги» порталда берирге жарайды.

Инвентаризация да борчлу халда этилликди. Эсепде турмагъан объектлени бары да кадастргъа тюшерге боллукъдула, аланы иелерине уа къагъытларын женгил халда жарашдырыргъа онг берилликди.

Анга уа ма бу документле изленирикдиле:

- жерни къагъытлары (ЕГРН-ден выписка, иеликге шагъатлыкъ этген документ неда сатыу-алыу этилгенни келишими);

- юйню техника планы;

- эсепге салыргъа заявление (Росреестр, МФЦ неда «Госуслуги» бла этиледи);

- къырал пошлина тёленнгенини юсюнден квитанция (350 сом).

Улбашланы Мурат.