Кёп болмай Къабарты-Малкъар къырал университетде вузну  китапханасы  къурап Уллу Хорламны 80-жыллыгъына аталып  "Шимал-Кавказ Уллу Ата журт урушну кезиуюнде: тарыхны эсде тутуу эм бюгюнлюкде болум" деген ат бла "тёгерек стол" болгъанды.

Ол кюн вузну китапханасында ветеран,  жамауат, энчи аскер операцияны ветеранларыны организацияларыны келечилери,  преподавательле эм башхала  да  студентлеге Уллу Ата журт урушну юсюнден  хапар айтхандыла. Ол санда  ата-бабаларыбыз чынтты жигитлеча  фашист душманлагъа къажау тургъанларыны, Кавказ ючюн сермеш стратегиялы  магъанасы болгъаныны эм башха шартланы да келтиргендиле. 

-  Жыйырманчы ёмюрню эм уллу къазауатларындан биринде, ата-бабаларыбызны жигитлигин унутургъа эркинлигибиз жокъду. Ала  хорларча, биз мамыр кёкню  тюбюнде ырахат жашау этерча  жанларын-къанларын аямагъандыла,- дегенди, жыйылыуну, ача КъМКъУ-ну китапханасыны таматасы Герийланы Аймани.

Уллу Ата журт урушну хатасын  Совет Союзну  хар инсанына да сынаргъа тюшгенди. Ол кезиуде эркегырыулары  къазауатха бармагъан хазна юйюр къалмагъанды. Аны бла байламлы КъМКъУ-ну проректору  Мурат Гукепшоков  белгили 115 -чи  атлы дивизияны санында къуллукъ этген атасыны къарындашыны жарсыулу къадарыны  юсюнден хапарлагъанды.

  - Ата журтларын жюреклери бла сюйген инсанла бюгюнлюкде да энчи аскер операциягъа къатышадыла. Бизни барыбызгъа да хорлам тежейме!  Анга биз да къошумчулукъ этерчабыз,  баш борчларыбыздан  бири  кючлю тыл къураргъады - алагъа жарсыгъаныбызны,  сау къайтырларын  сакълагъаныбызны терк-терк  билдире эм  билеклик эте турургъа  керекбиз, деп къошханды      Мурат Гукепшоков.

КъМКъУ-ну ветеранларыны советини председатели Хасан Шурдумов да тарыхны эсде тутууну магъанасыны юсюнден айтханды. Ол жаш адамлагъа ата-бабаларыны жигитликлерин унутмазларын, бусагъатда тыш къыраллада  сёгерге кюрешгенлерине  къулакъ салмазларын эм Хормабыз бла ёхтемленирлерин белгилегенди.

"Ата журтну къоруулаучулары" фондну республикада бёлюмюню таматасыны орунбасары Зульфия Кумышева  энчи аскер операциягъа къатышхан медикле борчларын толтурурча къаллай сынауладан ётерге тюшгенлерин билдиргенди. Аны бла бирге фонд  сакъатлагъа комплекс халда реабилитация  бардырыуну эм мамыр жашауда кеслерини жерлерин табарча болушлукъ тапдырыуну юсюнден да хапарлагъанды.

КъМР-ни Гуманитар тинтиуле жаны бла институтуну таматасы Касболат Дзамихов да Уллу Хорлам ючюн  къаллай багъа тёлерге тюшгенни эсге салгъанды. Ол санда миллионла бла ёлгенлени, жарсыулу къадарланы эм сыналгъан  къыйынлыкъланы  белгилерге боллугъун чертгенди.

 - Фронтда эм тылда да Совет Союзну адамлары кишиликлерин эм  жигерликлерин да кёргюзтгендиле. Кюн сайын уруш тюрлю-тюрлю сынаула келтиргенди, болсада хар ким хорларгъа керегин иги ангылагъандыла. Анга кёре халкъ бирикгенди, кишилигин эм таукеллигин да кёргюзтгенди. Тарых унутулургъа жарамайды, бюгюн эм тамбла да бизни ёхтемлендирлик эм юйретирик да олду,- дегенди  Касболат Дзамихов.

"Тёгерек столда" Уллу Ата журт урушда Шимал Кавказны халкъларыны магъанасы, жангы документле бла материалла, Уллу Ата журтну кезиуюнде Къабарты-Малкъарны болумуна бюгюнлюкде кёз къарам, Къабарты-Малкъар нацистлени къолуна тюшгенде  этген артыкълыкълары; Жаш тёлюню патриот сезимлерин кючлеуде Уллу Ата журт уруш бла энчи операцияны магъанасы,  Уллу Ата журт урушну кезиунде  китапханаланы болуму, Уллу Ата журт урушну суратлау маданиятда, кинематографияда, сурат жазыуда эм  театр бла байламлы чыгъармачылыкъда да къойгъан ыз деген темала да сюзюлгендиле.

Курданланы Сулейман.