Къабарты-Малкъарны Архив службасы Уллу Ата журт урушда хорламгъа 80 жыл толгъан байрамгъа хазырланыуну чеклеринде анга аталгъан кёрмюч къурагъанды. Анда ол урушну бетлерин ачыкълагъан суратлагъа эмда документлеге къараргъа боллукъду.

Биринчилеринде къонакъла Ата журтну къорууларгъа бизни республикадан атланнганланы, сора Совет Союзну Жигитлерини, Махтаулукъ орденни толу кавалерлерини, дагъыда фашистлени концлагерьлеринде къыйынлыкъ сынагъанланы, Къабарты-Малкъарда болгъанларында фашистле къыргъанланы бет сыфатларын кёредиле. Фронтдан письмола, урушну хатасындан сабийликден кери къалгъан сабийлени, ол къыйын кезиулени сынагъан жаш адамланы юслеринден документле, 115-чи дивизияны юсюнден материалла да сейирликдиле. Энчи стенд а 1945 жылда майда келген Уллу Хорламгъа жораланады.

Архив службада дагъыда бу байрамгъа атап документледен бла материалладан жарашдырылгъан «Тарых эс: Уллу Хорламны бетлери» китап чыгъаргъандыла. Ары бизни республикада туугъан, кеслери да Уллу Ата журт урушха къатышхан инсанланы юслеринден къысха айтылады. Ол санда тёрт жюзден артыкъ сурат, жетмишден аслам письмола, эсгериуле, саугъалау къагъытла да бардыла. Китап ол урушдан къайтып келгенден сора энтта да кёп жылланы халкъ мюлкню аягъы юсюне салыу бла кюрешип, урунууда жигитлик этгенлеге аталады.

Улбашланы Мурат.