Алгъаракълада Нальчикде эки кюнню ичинде бардырылгъан кенгешде къыралны ичинде финанс контроль этиу бла байламлы кенгеш бардырылгъанды. Аны ишине РФ-ни Финансла министерствосуну, федерал казначействону, монополиялагъа къажау службаны, КъМР-ни Экономиканы айнытыу министерствосуну келечилери, экспертле да къатышхандыла. Алтай крайдан, Вологодск, Нижегородск, Магъадан, Иваново, Ульянов областьладан эмда Чувашиядан келген къонакъла кеслерини регионларында бюджет жумушланы тындыргъанда цифралы финанс информацияны къалай хайырланнганларыны юсюнден хапарлагъандыла, сынамлары бла да шагъырейлендиргендиле.

Кенгешге къатышханлагъа алгъышлау сёзюн КъМР-ни экономиканы айнытыу министри Рахайланы Борис айтханды. Аны кезиуюнде сюзюллюк темаланы магъанасы уллу болгъанын, регионну финансларын жюрютюу системаны бютюнда тынгылы этерча, цифралы болумгъа кёче барыргъа кереклисин да чертгенди ол.

«Мен айтыргъа сюерик эдим, бу стратегиялы сессияны кезиуюнде кётюрлюк соруула, сёзсюз, уста специалистледен энчи кёзден къараллыгъын излейдиле. Бюгюн а мында жаланда ма аллай адамла жыйылгъандыла. Хау, бир-бир соруула къырал финансланы талай энчиликлери бла байламлыдыла, башхалары уа иш бла. Мен оюм этгеннге кёре, аланы бары да мында сюзюлюп, аланы юсю бла тийишли оноула этилликдиле», - дегенди Борис Магомедович.

Жыйылгъанланы алларына чыгъып сёз алгъанла ахчаны жюрютюу жаны бла борчланы эмда жангы амалланы юслеринден айтхандыла, финансла бла байламлы хар нени да федерал даражада тийишдириуню юсюнден сагъыннгандыла.

РФ-ни Финансла министерствосунда бюджет методология эмда финанс отчётланы жарашдырыу департаментни башчысыны экинчиси Светлана Сивец быллай жыйылыула ишге не жаны бла да хайырлы болгъанларын чертгенди: «Бюгюн биз мында коллегаларыбыз бла тюбешип, ишибизде баш магъаналы борчланы сюзерге, талай затлагъа бютюнда уллу эс бурургъа онг тапханбыз. Хар кюн, хар жыл да бизге жангы борчла саладыла, технологияланы эмда цифровизацияны заманында уа хар не да бютюнда терк бола барады. Алай бла бизни борчубуз –тюз, терк, тынгылы ишлеудю».

Жыйылыуда  дагъыда  биринчи эсепге салгъан электрон документлени 2026 жылдан башлап  хайырланып тебиреуню сюзгендиле эмда къыралны ичинде финанс контроль этиу жаны бла секцияны ишини эсеплерин чыгъаргъандыла.

Улбашланы Мурат.