Кёп болмай Къабарты-Малкъар къырал университетни электроника, робототехника эмда жалгъан акъыл  институтуну  студентлери Майский шахарда  «Севкаврентген-Д» заводда болгъандыла. Ол жолоучулукъну кезиуюнде ала предприятияны тарыхы, иши бла  да шагъырейленнгендиле.   

Кадрла жаны бла бёлюмню таматасы Кристина Смолина  къонакълагъа медицина техника чыгъаргъан предприятие кёбюсюнде рентген оборудование бла бийик качестволу медицина приборла къурап эм жарашдырып сатханын, ала бла башха регионланы да жалчытханын билдиргенди. Иш кёллю  жаш специалистле не заманда да керек болгъанларын айтып, къаллай усталыкъла изленнгенлерин, айныргъа къаллай  онгла къуралгъанларын, иш хакъны юсюнден да хапарлагъанды, окъуучуланы сорууларына да жууапла бергенди. 

Жаш адамла жангы технологияланы хайыры бла этилген оборудованиялагъа бла  приборлагъа уллу сейир этип къарагъандыла.   Инженер усталыкъла бла толуракъ шагъырейленнгендиле, республиканы промышленность жаны бла онгларына  да тюшюннгендиле.

Быллай жолоучулукъланы  промышленность туризмге санаргъа да боллукъду. Шёндю бизни къыралда ол терк айнып барады. Аны хайырындан  жаш адамла   жер-жерледе промышленность онгла бла шагъырейленирге, усталыкъ сайларгъа да боллукъдула. Иш бла жалчытханла уа кеслерине керекли кадрла хазырларгъа онг табадыла,  стажировканы ётерге сюйгенлеге аллай амал тапдырадыла.