«Акрополь» хьэщIэщым щызэхуащIыжащ илъэс зыбжанэ хъуауэ ди щIыналъэм щекIуэкI «Зэныбжьэгъугъэ» Iуэхум и зи чэзу Iыхьэр. Ар къызэригъэпэщащ КъБР-м лъэпкъ Iуэхухэмрэ жылагъуэ проектхэмкIэ и министерствэм.
Зэхыхьэр ирагъэкIуэкIащ ЩоджэнцIыкIу Алий и цIэр зезыхьэ Къэбэрдей къэрал драмэ театрым и актрисэ, КъБР-м щIыхь зиIэ и артисткэ КIэхумахуэ ФатIимэрэ КъБР-м и Музыкэ театрым и уэрэджыIакIуэ Енин Евгенийрэ.
«Зэныбжьэгъугъэ-2025» Iуэхум хэта щIалэхэмрэ я Iыхьлыхэмрэ хьэщIэщым щызэхуэсат. Апхуэдэу абы ирагъэблэгъат щIыналъэм и министерствэхэм, IуэхущIапIэ зэмылIэужьыгъуэхэм я унафэщIхэр, республикэм и къуажэхэмрэ къалэхэмрэ я Iэтащхьэхэр, жылагъуэ IуэхущIапIэхэм я лIыкIуэхэр.
ХьэщIагъэ хабзэр къагъэщIэрэщIэжын, нэхъ гъунэгъуу зэрыцIыхун, лъэпкъхэм яку дэлъ зэпыщIэныгъэр ягъэбыдэн папщIэ хьэщIапIэ щыIа щIалэхэмрэ ахэр езыгъэблэгъа бысымхэмрэ утыкум чэзууэ ирашащ, я махуэхэр зэрагъэкIуам трагъэпсэлъыхьыну, Iуэхум хэтахэр ягъэлъэпIэну.
Бысымхэм фIыщIэ хуащIащ къахуеблэгъа щIалэхэр я деж щыIэм хуэдэу зэрагъэхьэщIам, гулъытэ зэрыхуащIам, апхуэдэу къуажэ, унагъуэ хамэхэм дзыхь зыщIу зи бын хьэщIапIэ зыгъэкIуа, жэуаплыныгъэ ин зыпылъ Iуэху дахэм хэта дэтхэнэми.
ХьэщIапIэ щыIа щIалэхэр тепсэлъыхьыжащ бысымхэр гуапэу къазэрыIущIам, гукъинэжу зэрагъэхьэщIам, я махуэхэр щIэщыгъуэу, нэгузыужьу зэрагъэкIуам, «Зэныбжьэгъугъэ» Iуэхур ягу зэрыдыхьам. НыбжьыщIэхэр зэрыцIыхуащ, курыт еджапIэм зэгъусэу кIуащ, унагъуэ Iуэхухэр зэдащIащ, бысымхэм я гъащIэр, хабзэхэр, лъэпкъ шхыныгъуэхэр зыхуэдэр зрагъэщIащ, загъэпсэхуащ, дяпэкIи зэрыгъэныбжьэгъуну, зэкIэлъыкIуэну, жып телефонкIэ зэрыщIэну зэрамурадри къыхагъэщащ.
Зэхыхьэм хэта щIалэхэмрэ абыхэм я адэ-анэхэмрэ щIыхь тхылъхэмрэ саугъэтхэмрэ иратащ, Iуэхур къызэзыгъэпэщахэм къабгъэдэкIыу.
- Iуэхум хэта унагъуэхэм я пщэрылъхэр ягъэзэщIэныр къайхъулIащ. Дауи, тыншкъым умыцIыху унагъуэм уи бын хьэщIапIэ бгъэкIуэну. Бысымхэри елIэлIащ щIалэхэр екIуу зэрагъэхьэщIэным, - жиIащ КъБР-м Лъэпкъ Iуэхухэмрэ жылагъуэ зэгухьэныгъэхэмкIэ и министр КIурашын Анзор. – ФIыщIэшхуэ фхузощI республикэм щекIуэкI Iуэхум къыпэджэжа, абы хэта дэтхэнэ зы унагъуэми. Лъэпкъхэр дызэкъуэзычыну зи мурадхэм мыпхуэдэ IэмалкIи дапэщIэтыфынущ! ФIыщIэ лей хуэсщIыну сыхуейщ илъэс еплIанэ хъуауэ мы Iуэхум жыджэру хэт, Хьэбэз къуажэм щыщ Кайгермазовхэ я унагъуэм. Iуэхум зэдыхэта щIалэхэр курыт еджапIэ нэужьым зы еджапIэ зэгъусэу зэрыщIэтIысхьам и щапхъэхэр диIэщ. Ар и щыхьэтщ мы лэжьыгъэм мыхьэнэшхуэ зэриIэм.
- Ди адэжьхэм къытхуагъэна, щIэблэр зыщIапIыкIыу къекIуэкI, ди лъапIэныгъэхэм щыщу къалъытэ хьэщIагъэ хабзэ дахэр зи лъабжьэ мы зэхыхьэр къызэзыгъэпэща министерствэм фIыщIэ хуэфащэщ. Хабзэм идэртэкъым хьэщIэр щежьэжынумкIэ уеупщIыну, ар емыкIуу къалъытэрт. Ди республикэм и къуажэхэмрэ къалэхэмрэ я зэпыщIэныгъэхэр нэхъ куу, быдэ зэрыхъум укIэлъыплъыну гуапэщ, - жиIащ КъБР-м и Парламентым щэнхабзэмкIэ, граждан жылагъуэм зегъэужьынымрэ хъыбарегъащIэ IуэхухэмкIэ и комитетым и унафэщI Текуев Амырбий. – Хабзэ дахэр къэгъэщIэрэщIэжыным хэта унагъуэхэр Тхьэм фигъэпсэу! Лъэпкъхэр дызэкъуэзыгъэувэ хабзэхэр адэкIи дывгъэхъумэ! Ди щIыналъэм щыпсэухэм я мызакъуэу, лъэпкъ 200-м нэблагъэ зэрыс ди къэралми мы Iуэхум гъуэгу щигъуэтамэ фIыт. ДяпэкIи фызэрылъытэ, фызэрыIыгъ, фызэкIэлъыкIуэ!
Iуэхум хэта адэ-анэхэм ар къызэзыгъэпэщахэм фIыщIэ хуащIащ, лъэпкъхэм яку дэлъ зэныбжьэгъугъэр гъэбыдэным зэрыщхьэпэм папщIэ.
Пшыхь гуапэр ягъэдэхащ Музыкэ театрым и уэрэджыIакIуэ, КъБР-м щIыхь зиIэ и артисткэ Бэрэгъун Марианнэ, КъБР-м щIыхь зиIэ и артист Теппеев Алим, КъБКъУ-м лъэпкъ къафэхэмкIэ щапхъэу къалъыта «Къафэ» ансамблым, эстрадэ къафэхэмкIэ щапхъэу къалъыта «Арабеск» ансамблым, къафэхэмкIэ щапхъэу къалъыта «Насып» ансамблым я артистхэм.
ТЕКIУЖЬ Заретэ.
Сурэтхэр Къарей Элинэ трихащ.
