Москвада «Единая Россия» Битеуроссей политика партияны Председатели, РФ-ни Премьер-министри Дмитрий Медведев федерацияны субъектлерини башчылары – «Единая Россия» партияны регион бёлюмлерини секретарьлары бла тюбешгенди. Анга Къабарты-Малкъарны Башчысы Казбек Коков да къатышханды.
-Губернаторланы къаууму кеслерини регионларында партияны бёлюмюне башчылыкъ этерге сюйгенлерин билдиргендиле. Аны мен тюзге санайма. Кертиди, регион бёлюмню секретарыны къуллугъу алагъа къошакъ ауурлукъ жетдиреди. Башха жанындан а, партиябыз башчылыкъ этген биригиудю, ол а РФ-ни хар субъектине бек уллу онгла береди, бек алгъа уа бир жолгъа мингле бла адамланы эшитирге. Партиябызгъа бек узакъ жерледен да тюрлю-тюрлю даражада он мингле бла депутатла киредиле. Сизде биринчи бёлюмле бардыла, ала федерацияны субъектини башчысына аны секретарьлыкъ ишине себеплик этерге керекдиле», - деп чертгенди Медведев.
Ол кюн окъуна «Единая Россияны» Генсоветини Президиуму КъМР-ни Башчысы Казбек Коковну, дагъыда 12 субъектни оноучуларын партияны регион бёлюмлерини секретарьларыны къуллукъларына дурус кёргенди. Алайды да Адыгеяны, Башкирияны,Якутияны башчылары, Примор эмда Ставрополь крайланы, Киров, Нижегород, Новосибирск, Самара, Мурманск областьланы губернаторлары, Севастопольну таматасы единороссланы регион бёлюмлерини башчыларыны санына къошулгъандыла.
-Кючюбюзню бирикдирирге заман болгъанды. Алай бла айырыучуларыбызны аллында, регионлада, партияны жер-жерли бёлюмлеринде ишлеген коллегаларыбызны аллында да бетибизни чыгъарлыкъбыз,-дегенди «Единая Россияны» Генсоветини секретары Андрей Турчак, жыйылыуда сёлеше.
