Драмэмрэ гушыIэмкIэ Тэ­тэр къэрал театр Тинчурин Карим и цIэр зезыхьэм и актёрхэр Налшык къалэм и хьэщIэщ, «Большие гастроли» урысейпсо Iуэхум хы­хьэу. ЩоджэнцIыкIу Алий и цIэр зезыхьэ Къэбэрдей къэрал драмэ театрым ди журналистхэр мэлы­жьы­хьым и 24-м щаIущIащ Тэ­тэр­­станым къикIа артистхэм. 

Пресс-конференцым хэтащ ЩоджэнцIыкIу Алий и цIэр зезыхьэ Къэбэрдей къэ­рал драмэ театрым и режис­сёр нэхъыщхьэ, УФ-м щIыхь зиIэ и актёр Шыбзыхъуэ Басир, КъБР-м щIыхь зиIэ и артист Хьэмырзэ Ахьмэд, Тэтэрстан Республикэм и цIыхубэ артисткэ Тухфатуллинэ Резе­дэ, Джалил Муса и цIэкIэ ягъэ­ува саугъэтым и лауреат Пискунов Артём, Тэтэрстан Республикэм щIыхь зиIэ и артисткэ, Джалил Муса и цIэкIэ ягъэува саугъэтым и лауреат Саляховэ Резедэ. 
Тхыдэ дахэ зиIэ, мы гъэм илъэс 91-рэ ирикъу Тэтэр театрым и репертуарым хэтщ жанр зэмылIэужьыгъуэхэм щыщ спектакль нэхъыфIхэр, ныбжь зэмылIыужьыгъуэхэм итхэм яхуэгъэзауэ. Актёрхэм мы махуэхэм Налшык щагъэлъэгъуэнущ Тинчурин Карим и пьесэм къытращIыкIа «Угасшие звёзды» (режис­сё­рыр Гариповэ Резедэщ) макъамэ трагедиер. Ныбжьы­щIэ­хэм яхуэгъэзауэ артистхэм къашащ Фархутдинов Щамил и «Волшебная арена» таурыхъыр (режиссёрыр Гатауллин Камилщ), Минуллин Туфан и «Студенческий договор. Наши дни» (режиссёрыр Гариповэ Резе­дэщ) макъамэ гушыIэр. Иужь дыдэу хьэщIэхэм Налшык щагъэлъэгъуэнущ Зайдуллин Ркаиль и пьесэм режиссёр Казакбаев Ильсур къытри­щIыкIа «Ашин» драмэр. Лэ­жьы­гъэхэр тэтэрыбзэщ зэ­ра­гъэ­лъэгъуэнур, урысыбзэкIэ зэдзэкIауэ уедэIуэну Iэмал щы­Iэщ.
КъыжыIапхъэщ, ЩоджэнцIыкIу Алий и цIэр зезыхьэ Къэбэрдей Къэрал драмэ теат­рым и артистхэр Тэтэр Республикэм гастроль ид­жы­б­­лагъэ къызэрикIыжар. Хьэ­щIэ­хэм къыхагъэщащ тэтэрхэм адыгэ спектаклхэр ягу зэ­рыдыхьам хуэдэу, ди щIыналъэм щыпсэухэми тэтэр спектаклхэр гъэщIэгъуэн ящы­хъуну зэрыщыгугъыр. 
- Ди щIыналъэм фыкъы­зэ­реб­лэгъар ди гуапэщ! Къэ­бэр­дей театрым и артистхэм гукъинэж ящыхъуауэ тепсэ­лъы­хьыжащ иджы дыдэ Тэ­тэр­станым щыщыIам хьэ­щIагъэ ин къазэрефхам.       ­Ди зэкIэлъыкIуэныгъэр ди ­щIыналъэхэмрэ театрхэмрэ яку къыдэхъуэну зэныбжьэ­гъугъэ быдэм щIэдзапIэ ­хуэхъуну дыщогугъ! - жиIащ Шыбзыхъуэ Басир. - Щэнхабзэ и лъэныкъуэкIэ лъэпкъхэр зэхъуэжэным мыхьэнэшхуэ иIэщ. Ар нэхъри дызэкъуэзыгъэувэщ икIи ди Iуэхухэр езыгъэфIакIуэщ. 
ХьэщIэхэр къытеувыIащ Къэ­бэрдей-Балъкъэрым ирашу Тэтэрстаным щагъэ­лъэгъуа литературэ, драмэ лэжьыгъэхэр щIэщыгъуэ зэ­ра­щыхъуам, къафэмрэ уэ­рэдымрэ фIыуэ зылъагъу артистхэр гукIи псэкIи ягу зэрыдыхьам. Абы я гуапэу дыщIагъужащ бысымхэр уэ­рэдкIэ, макъамэрэ къафэ-кIэ, лъэпкъ шхыныгъуэхэмкIэ гуапэу зэраIущIар, ди щIыналъэм и дахагъэм, я гур зэрихьэхуар, дяпэкIи зэкIэ­лъы­кIуэну зэрыщыгугъыр. 
Журналистхэм я упщIэхэм жэуап щратым, Тэтэрстан театрым и лIыкIуэхэм къыхагъэщащ я артистхэр цIыху ­40-м зэрынэблагъэр. Дамыгъэ лъапIэхэр зыхуагъэфэ-ща артист Iэзэхэм щIалэгъуа­лэр куэду къазэрыщIэувэр, театрым езым оркестр зэ­ри­Iэ­жыр, Тэтэрстаным щыпсэу лъэпкъхэм театрыр фIыуэ зэралъагъур, урысыбзэкIи лъэп­къыбзэкIи ягъэлъагъуэ я лэжьыгъэхэм цIыхушхуэ къызэрекIуалIэр жаIащ. 
- Актёрхэм ди зэныбжьэ­гъугъэр гъэбыдэным япэ лъэбакъуэ зэрыхэтчар фIыщ. Зэ кIуэгъуэкIэ лэжьыгъэ куэд пхуэгъэлъэгъуэнукъым, ауэ кIэщI-кIэщIурэ дызэ­кIэ­лъы­кIуэфмэ, дыщIэпсэу театреплъхэм ягу къызэрытхьэхунум дыхущIэкъунущ. Илъэс зыбжанэкIэ узэIэбэкIыжмэ, Тэтэрстаным тшауэ щыта «Бгъэмрэ бгъэ анэмрэ» спектаклым тэтэр театреплъхэр гуапэу къазэрыIущIар дигу къинэжащ, - жиIащ Хьэмырзэ Ахьмэд. - Тэтэрстаным и театр гъащIэр зэманым зэрыдекIур, абы зэрызевгъэу­жьыр нэрылъагъу тщы­хъуащ. 
Саляховэ Резедэ и псалъэм къыхигъэщащ «Угасшие звёзды» лэжьыгъэр лъэпкъ фэилъхьэгъуэхэмрэ макъамэкIэ зэрыгъэнщIар, «Ашин» драмэм тхыдэр лъабжьэ зэрыхуэхъуар, анэ­дэлъ­хубзэр, лъэпкъ щэнхабзэр хъу­мэным ар зэрытелажьэр, спектаклхэр тэтэрыбзэкIэ гъэ­увыным гулъытэ ин зэры­хуа­щIыр.
Шыбзыхъуэ Басиррэ Хьэ­мыр­зэ Ахьмэдрэ хьэщIэхэм ехъуэ­хъуащ я лъэпкъ щэн­хабзэр яхъумэжынымкIэ, зра­гъэужынымкIэ ехъу­лIэ­ныгъэ яIэну. 
БЖЬЫХЬЭ Розэ.