Къабарты-Малкъар къырал аграр университетде «Фермерни школу» ачылгъанды. Аны бла байламлы жыйылыугъа КъМР-ни экономиканы айнытыу министрини орунбасары Ольга Белецкая да къатышхан эди, деп билдиргендиле министерствону пресс-арасындан.

Бу проектни университет Россельхозбанк бла бирге бардырады, аны кесине да эки жыл болады. Аны чеклеринде «Терек бахчачылыкъ», сора «Сют эмда эт малчылыкъ» усталыкълагъа отуз инсанны юйретирикдиле.

«Фермерни школу» Битеуроссей билим бериу башламчылыкъды. Бизни банк аны АПК-ны тири айнытыу хыйсап бла хар регионда, ол санда Къабарты-Малкъарда да бардырады. Быйылгъы курсда отуз адам окъурукъду, аланы саны былтырдан бешеуленнге кёп болгъанды. Дагъыда бир магъаналы энчилик: аланы санына онбеш инсан энчи аскер операциягъа къатышханладыла. Биз барына да эл мюлкде жангы усталыкъ алыргъа неда тутхан ишлерини энчиликлерине бютюнда терен тюшюнюрге себеплик этерикбиз. Россельхозбанкны атындан «Фермерни школунда» окъурукълагъа жетишимле тежейбиз, ызы бла аланы банкны хайырланыучуларыны санында сакълайбыз», - дегенди финанс учрежденияны регионда бёлюмюню башчысы Алим Сокуров.

Бизни республика бла бирге бу проектге 34 регион къатышады. Барындан да минг чакълы инсан окъуйду. Алагъа 150 сагъатны ичинде билим берилликди, энтта да жюз сагъатны сынам ишлеге къатышырыкъдыла, ахырында уа диплом аллыкъдыла. Курсну болжалы эки бла жарым ай болады.

Улбашланы Мурат.