КъМР-ни Жамауат палатасында энчи почта блокну хайырланып башлаугъа жораланнган къууанчлы жыйылыу болгъанды. Ол «Уллу Ата журт урушда Хорламны 80-жыллыгъы. Нацизмге къажау кюрешде бирликни эмда мамырлыкъны жылы»  деген ат бла бардырылгъанды. 

Анга Жамауат палатаны таматасы Хазратали Бердов, аны орунбасары  Ляна Балкизова, бу ишни башламчысы Руслан Черкесов, палатаны къауумуна киргенле, жамауат организацияланы келечилери, Нальчикде 7-чи номерли окъуу юйден кадетле да къатышхандыла.     
- «Россейни Почтасыны» КъМР-де  управлениясыны бу магъаналы ишни тамамларгъа  Жамауат палатаны сайлагъаны бек хычыуун кёрюннгенди. Ол бизге жангы ишди. Биз анга уллу ыразылыкъ бла тюбегенбиз. Аны ючюн  республиканы почта бёлюмюню оноучуларына ыспас этебиз, -деп, Хазратали Бердов жыйылгъанланы келе тургъан жарыкъ байрамла бла  къызыу алгъышлагъанды.
Ляна Балкизова уа почтаны бу белгисинде Ата журт урушну биринчи даражалы майдалы, аны тёгерегинде уа Хорламны келтиргенлени суратлары болгъанларын билдиргенди. «Аланы фронтчу суратчыла Макс Владимиров, Анатолий Архипов, Дмитрий Николаев Уллу Ата журт урушну заманында алдыргъандыла. Ма аланы хайырындан, суратлагъа къарап, озгъан жылланы юслеринден хапар билирге онг барды»,- деп къошханды ол. Почта блокну тиражы  элли сегиз минг болгъанын да айтханды Ляна Балкизова. 
Руслан Черкесов а, Уллу Хорламны 80-жыллыгъына жораланып, быллай сейирлик иш бардырылгъанына  ыразылыгъын билдире, Ата журт урушну суратлары бла энчи блок ёсюп келген тёлюлеге, филателистлеге уа сыйлы  саугъа болгъанын чертгенди.
Андан сора биринчи  блокга мухурну, къол ызын да  Хазратали Бердов салып, аны кадетлеге, къонакълагъа да  саугъагъа бергенди.
Почтачыла уа  сурат кёрмюч да къурагъандыла.
Холаланы Марзият.