Черногорием и къалащхьэ Подгорицэ къикIыу хъыбар гуапэ къытIэрыхьащ мы махуэхэм. ДзюдомкIэ абы щекIуэкI европей чемпионатым Урысей Федерацэм и командэ къыхэхам хэту щыIэ адыгэ щIалэ Блий Iэюб етIуанэ увыпIэр къыщихьащ.
Балигъхэм яхэту Европэм и чемпионатым щыбэна Блий Iэюб и плъапIэу щытар дыщэ медалырт. Пэжыр жыпIэмэ, абы лъаб- жьи иIэт. Европэм дзюдомкIэ пашэныгъэр къыщыхьыным хуэунэтIауэ ныбжьыщIэхэми, абыхэм нэхърэ нэхъыжьхэми, щIалэгъуалэми я деж щекIуэкIа зэхьэзэхуэхэм етIуанэ щыхъуат, Тыркумрэ, Узбекистанымрэ «Тажышхуэхэр» къыщихьат, дуней-псо, европей зэхьэзэхуэхэм мызэ-мытIэу щытекIуат иужьрей илъэсхэм. Абы нэмыщI, килограмм 60 зи хьэлъагъхэм я деж къэралым бжьыпэр щызыIыгъхэм яхэтщ.
Уеблэмэ, абы къыхэкIыу, иджырей зэхьэзэхуэм Iэюб зыхэхуа «В» гупым япэу щагъэуват, абы къыдэкIуэуи, япэ зэIущIэр блигъэкIыну хуит ящIат. ЕтIуанэ къекIуэкIыгъуэм ди щIалэм гуащIэу къыщыпэщIэтащ Словакием и бэнакIуэ Томанек Джозеф, ауэ, дауэ абы ищIами, ди щIалэм игъэлъэгъуа Iэзагъэм ар IэщIэкIакъым.
Абы къыкIэлъыкIуэу Iэюб IущIащ щIалэгъуалэм я дунейпсо чемпионатым етIуанэ щыхъуа, Тбилиси къалэм «Шлемышхуэр» къыщызыхьа, Азербайджаным и бэнакIуэ лъэщ Байрамов Туран. Мыбдежми, ди щIалэр къызэрытридзэн Iэмал абы къыхуэгъуэтакъым. Блийм япэщIыкIэ «ваза-ари» къратащ, иужькIэ, судьяхэм къытрагъэзэжу видеокIэ еплъыжри, «иппон»-кIэ зэрахъуэкIыжащ икIи текIуэныгъэр Iэюб къратащ.
Финалым и Iыхьэ ныкъуэм ар щыIущIащ Франджым и ныпым щIэту банэ, Олимп джэгухэм я призер, куржы бэнакIуэ лъэщ Мхеидзе Лука. Подгорицэ щызэхуэзэн ипэкIэ ахэр тIэу зэбэнати, зэрызэ текIуэныгъэхэр къахьат. Иджы Блийр япэ ищащ. Iэюб зыхуекIуа Iэмалхэм щхьэкIэ «ваза-ари» тIэу къратри, финалым кIуащ.
АдэкIэ Iэюб иджыри зы куржы щIалэ къыщыпэщIэтащ, уеблэ- мэ япэрейм нэхърэ нэхъ лъэщыжу - щIалэгъуалэми, балигъхэми я деж дуней псом я чемпион щыхъуа бэнакIуэ Сардалашвили Георгий. Ар набдзэгубдзаплъэу къыкIэлъыплъагъэнщ Iэюб и бэнэкIэм икIи ди щIалэм и щэхухэр зригъэщIауэ къыщIэкIынут. Зэхьэзэхуэм хухэха зэманым и кIэм нэсыху щIалитIыр зэныкъуэкъуащ, зэрытемыгъакIуэу, ауэ, икIэм-икIэжым, куржы бэнакIуэм ди щIалэр къиубыдащ, «юкко» къратри, Европэм и дыщэ медалыр Iэюб фIихьащ.
«Си жагъуэщ, дауи, зэхьэзэхуэм и кIэм нобэ сыкъызэрыщыхагъэщIар, итIанэми, дыжьын медалым щхьэкIи фIыщIэ щIын хуейщ. ЕтIуанэ гъуэгу абы сызэрытекIуэжыным сыхущIыкъуэнщ. Илъэс къэс сызыхэта европей зэхьэзэхуэхэм сыт щыгъуи етIуанэ сыщыхъуащ, си гугъащ мы гъэм абы зезгъэхъуэжыну, ауэ, зэрыжаIэу, аргуэру а щыуагъэ дыдэхэр зыIэщIэзгъэкIащ.
Франджым и бэнакIуэм, Олимп джэгухэм я призерым сытекIуэфыным мыхьэнэ иIэт си дежкIэ. Ар спортым и лъагапIэм ухуэзышэ лъагъуэхэм щыщщ. Сыхуейщ бжьыпэр субыдыну, си хьэрхуэрэгъу псоми сатекIуэну. Финалым сыхуэхьэзырт, адрей дэтхэнэ зэIущIэми хуэдэу. Къэсхьыну сыхуеящ ар, ауэ си хьэрхуэрэгъум и кIэныр нобэ къикIащ, ар си япэ ищащ. Мы чемпионатым зыхуэзгъэхьэзыращ зыхуэзгъэувыжа къэланым тету. Ауэ, сыкъыщыхагъэщIакIэ, зыгуэрхэм сыхунэмысу къэнауэ аращ. Унэм сыкIуэжмэ, си тренерымрэ командэм и унафэщIхэмрэ я гъусэу си щыуагъэхэм дыхэплъэжынущ, Iуэхур зэхэдгъэкIынущ. Евро-пэм и чемпионатыр илъэс къэс ирагъэкIуэкI, аращи, 2026 гъэм зыхуэзгъэхьэзырынущ.
Си гугъэщ си медалымкIэ си благъэхэмрэ Iыхьлыхэмрэ згъэгуфIэну. Насыпщ, ахэр гуфIэу щыплъагъум деж», - яжриIат журналистхэм Iэюб зэIущIэ нэужьым.
Нэгъабэ «Тажышхуэр» къэхьыным хуэунэтIауэ Тыркум щекIуэкIа зэхьэзэхуэм Блий Iэюб щытекIуа нэужь, журналистхэм яжриIауэ щытащ, медалу къихьу хъуар и анэм зэрыритыр. Мис иджы, аргуэру игъэгуфIэну зы къыхуешэ. И насыпщ апхуэдэ бын зиIэ дэтхэнэ зы анэми!
ХЬЭЩЫКЪУЕЙ Олег.
