КъМР-ни Къырал миллет библиотекасында КъМР-ни халкъ жазыучусу Моттайланы Светлананы орус тилде жазылгъан «Кесибизни заманыбызда» деген китабыны кёргюзтюую болгъанды. Анга республикада чыгъармачылыкъ бла кюрешген адамланы юслеринден материалла киргендиле. Болсада  тюбешиуде хапар жаланда китапны юсюнден угъай, толусунлай Моттайланы Светлананы ишини юсюнден баргъанды. Бир кеси сау институт этерик ишни тамамлагъан, заманыбызны юсюнден келлик тёлюлеге шагъатлыкъ китапла хазырлагъан Светлана Мустафаевнаны «Кесибизни заманыбызда» деген жыйымдыгъы Миллет библиотеканы директору Анатолий Емузовну башламчылыгъы бла КъМР-ни Къырал саугъасына кёргюзтюлгенди.  

Жыйылыуну Анатолий Емузов ачханды. Ол Светлана Мустафаевнаны фахмусуну кёп бети болгъанын чертгенди: аны газетледе, журналлада статьялары терендиле, аланы адабиятны билген адам жазгъаны кимге да баямды, аны бла бирге назмулары да окъуучулагъа саугъадыла, ала антологиялагъа, окъуу китаплагъа киргендиле, кёп тиллеге кёчюрюлгендиле. Тил устасы Моттайланы Светлана кеси да тилманчлыкъ  иш бла жетишимли кюрешеди, халкъланы араларында шуёхлукъну кючлейди. Анатолий Емузов поэтесса ишине бир заманда да  сууукъ кёзден  къарамагъанын, сёзге керти къуллукъ этгенин айтханды. Пушкинни, Лермонтовну, Ахматованы назмулары малкъар тилде – окъуучулагъа ол къаллай саугъады!

Анатолий Гузерович таулу поэтесса ёз халкъыны тарыхына аслам эс бургъанын да  белгилегенди: «Моттайланы Светлана кёчгюнчюлюкню, ызы бла Ата журтубузгъа къайтыуну юсюнден кёп жазгъанды. «Аны бла бирге «Кесибизни заманыбызда» деген китабында  Къабарты-Малкъарда жашагъан башха миллетлени  белгили адамлары бла да шагъырейленирге онгубуз барды», - дегенди. 

КъМР-ни Парламентини депутаты Текуланы Амырбий: «Сизни чыгъармачылыкъ ишигиз бла ёхтемленебиз, мындан ары да жазыу ишде битеу салгъан муратларыгъызгъа жетерча саулукъ, кюч-къарыу тилейбиз сизге», - дегенди. 

КъМР-ни халкъ поэти Беппайланы Муталип Моттайланы Светлана малкъар адабиятны битеу дуния билир ючюн кёп зат этгенди,  дегенди. 

Тарыхчы, жазыучу Сафарби Бейтуганов былай айтханды: «Кесибизни заманыбызда» деген китапха бир жюз бла жетмиш алты очерк, заметка киргендиле. Ол бек уллу ишди! Аланы окъугъан хар  адам ызы бла жазыучуну чыгъармаларына кёчерикди. Сёз ючюн, китапда Отарланы Керимни бек биринчи болуп малкъар адабиятха баллада жанрны кийиргени жазылады. Аны балладаларын окъуругъунг келеди. Бегийланы Абдуллах а «малкъар адабиятда сыйлы жерни алады», деп жазады Светлана Мустафаевна. Аллай бийик багъа уа окъуучуну Бегий улуну назмуларына элтир деп ийнанама. Беппайланы Муталип а къысха формаланы устасы болгъаны чертиледи. Нек ийнанама мен Светлана Мустафаевнаны оюмларына? Биз бирге ишлеп тургъанбыз, мен аны  чыгъармачылыгъын уста билеме, аны хар тизгини сейирди, кертиди да андан».  

Жазыучу  Мария Котлярова Моттайланы Светлананы хар жазгъан адамына сейири барды, ол аланы энчи шартларын эринмей жыяды, бек сюерик эдим Бабаланы Ибрагимни юсюнден да жазса эди, дегенди. 

Гуманитар тинтиулени бардыргъан институтну къарачай-малкъар адабият бёлюмюню таматасы Сарбашланы Алёна поэтесса миллет адабиятны айныууна уллу къошумчулукъ этгенин чертгенди. Сёз ючюн, аны хайырындан Этезланы Омарны кёп жылланы ичинде басмаланмай тургъан «Урушну отунда» деген романы чыкъгъанды. Фахмулу поэт Зумакъулланы Танзиляны юсюнден орус тилде «Сёз эм къадар» деген китапны да Светлана Мустафаевна хазырлагъанды. 

Ингирни ахырында Моттайланы Светлана жашау аны кёп белгили адамла бла тюбешдиргенин айтханды: Къулийланы Къайсын, Зумакъулланы Танзиля, Борис Темирканов эм башхала бла да. Сора ол келгенлеге аны хурметин кёрюп жыйылгъанлары ючюн, китапхананы миллет эм краевед бёлюмюню таматасы Гергъокъланы Лейлялагъ бу тюбешиуню къаралыууна себеплиги ючюн жюрек ыразылыгъын билдиргенди. 

Байсыланы Марзият.