Ол тийреге  жылны къайсы кезиуюнде барсанг да, кир-кипчик, къалгъан къулгъан затланы келтирип, ким да алайгъа атхан сунар эдинг, аллай бир тизгинсиз болуп тургъанды алайлары иги кесек замандан бери да. Жаяу айланнганла, машиналары бла келгенле да ол болумну кёрмей амаллары жокъ эди. Аллай халны Уллу Кизиловкада, анга жууукъ жерде  да кёрюрге боллукъ эди.

 -Биз да сабийле бла алайлада  кёп кере  жаяу айланнганбыз, къайры къарасанг да,  шешала, къагъыт, пластик орунла, ким биледи ала токъсанынчы жылладан бери окъуна тура болурла,- деп хапарлайды субботникни къураргъа  къатышханладан бири Эльдар Бегидов. -Ол затланы кёрюп тургъан бек къыйынды эмда эригиулюдю!  Бир къауум адам болдукъ да, тизгинни жыйдыкъ. Андан сора аны юсюнден кенг асламлагъа социал сетьни хайыры бла билдирдик. Бек алгъа сегизеулен ыразылыгъын айтхандыла, андан сора жыйырма беш адам. Алгъаракълада  къалгъан- къулгъан, машоклагъа сыйынмагъанг уллу затланы санамай, 209 машок жыйышдыргъанбыз.

Субботникге къатышхан жашланы бла къызланы этген ишлери жюреклерин асыры къууандыргъандан, хар ыйыкъ сайын  жыйылып, тёгерекни тизгинли этерге  келишебиз эмда бу ишге бютюн кёп адам къатышырча этебиз. Алай бла  бизге болушханла, ишлегенде керекли затланы сатып алыргъа  ыразылыкъларын билдирген адамла да табыладыла. Акциябызгъа «Сосрукъ» ресторанда ишлегенле да  ыразылыкъларын билдиредиле эмда ол тийрени тазалагъанланы татыулу эмда татымлы ашла бла сыйлайдыла. Шахарны жол управлениясы уа жыйышдырылгъан кир-кипчикни тийишли жерге ташыгъанды.

 Сёзсюз, акциягъа къатышханла ангылайдыла, аланы бир кере тизгинни жыйгъанлары бла хар зат да тап болуп, экинчи алайгъа адам шеша, къагъыт, башха хылы-мылы затланы да атмай кетмезликлерин. «Биз тизгинни жыйып кетгенден сора да, ызыбыздан  келгенле  кир-кипчиклерин атып кетмезча этиу да бизге магъаналыды,- деп ангылатады Эльдар Бегидов.  -Былайгъа кече келгенле къоядыла къалгъан- къулгъан затларын асламында. Аны себепли ол тийреге чыракъла эмда видеокамерала орнатыргъа керекди. Абхазия майданда да алгъын алай эди: къауум адам болуп, алайгъа келип, дуния бла бир къалгъан- къулгъан затланы атып кетип тургъандыла, болсада ол тийрени жарытып, камерала да орнатылгъандан  сора, аллай зат болмайды. «Сосрукъ» а  шахарны белгилеринден бириди,  алайда жол бла кюн сайын кёп адам жюрюйдю, ол санда туристле, андан-мындан келген къонакъла да. Алайды да, ол тийреде тазалыкъ, тизгинлилик бек магъаналыды». 

Бу шабат кюн бла экоактивистле юч  субботникни бардыргъандыла, юч жюзден артыкъ машок  къалгъан-къулгъан затланы жыйгъандыла, болсада алыкъа  этиллик иш кёпдю. Энди боллукъ субботникни  агъач тийресинде бардырыргъа деп турабыз. Бизни ишибизге къошулургъа ыразыла бу телефон номерлеге  сёлеширге боллукъдула: 8(928)075-72-64; 8 (963)  280-39-79.

Холаланы Марзият.