Къырал автоинспекторла «Жолда жарыкъ бол!» ангылатыу жумушла бардыргъандыла. Анга Черек районну къошакъ билим бериу учрежденияларыны окъуучулары къатышхандыла.

Автоинспекторла Черек районда ОМВД-да жамауат советни келечиси Таппасханланы Мухтар бла бирге Къашхатауну маданият юйюнде ангылатыу жумушла бардыргъандыла. Ала сабийлеге жолда жюрюуню жорукъларын эсгертгендиле, кече адам  эсленирча кийимледе, юсюнде светоотражательлени хайырланыргъа кереклисин да эсгертгендиле.

- Окъуудан ингирде къайтхан кезиуде кесигизни къоркъуусузлугъуз ючюн къайгъырыргъа керексиз.  Водительле сизни кёрюр ючюн а кийимигизде, юсюгюзде жарытыучу затла болсала игиди,-дегенди Таппасханланы Мухтар.

 Тюбешиуню ахырында окъуучулагъа жолда жюрюуню жорукълары бла китапчыкъла эмда светоотражательле юлешиннгендиле.

Тикаланы Фатима хазырлагъанды.