Къабарты-Малкъар къырал аграр университетде «Жылны устасы» деген Битеуроссей педагогика конкурсну регионда кезиуюню бир кесеги ётгенди. Вузну «Битеулю билим бериу» бёлюмюню устазы Карина Макоева аны чеклеринде мастер-класс бардыргъанды. Ол «Уллу Ата журт уруш адам атлада эмда бетледе» дерсин бардыргъанды. Аны магъанасы, ол айтханнга кёре, ёсе келген тёлюде патриотлукъ сезимни къозгъауду, аны тири болургъа чакъырыуду, къыралны тарыхында хар инсан да магъаналы болгъанына тюшюндюрюудю.

Дерсни кезиуюнде презентацияла эмда видеороликле кёргюзтюлгендиле. Аланы хайырындан къараучула урушну заманларында болумну, тёлюлени араларында байламлыкъланы, адамла салгъан къыйынны бютюнда терен сезгендиле.

Бу конкурсха педагогланы къайсысы да къатышыргъа эркинди. Ала заявкаларын билим бериу организацияларыны юсю бла неда кеслери берирге боллукъ эдиле. Аны регионда кесегини эсебин келир айда чыгъарлыкъдыла, анда хорлагъан а, ызы бла, Къабарты-Малкъарны атындан финалгъа къатышырыкъды. Ол быйыл 2 сентябрьде Энчи орта билим бериуню кюнюнде бардырыллыкъды.

Улбашланы Мурат.