Быйылны ючюнчю  апрелинде Иркутск областьны Усольск районунда жашагъанлагъа къоркъуулу болумну сынаргъа тюшгенди. Ол ингирде  Ту-22МЗ самолёт план учууун бардыра тургъанлай, бузулуп, Буреть элни къатында къоннганды. 

Ол кюн учууну бардыргъан экипажны тёрт пилоту, самолётдан секирип, сау къалгъандыла, лётчикледен бири уа  ажымлы ёлгенди. Ол бизни жерлешибиз, 40-жыллыкъ  Жантууланы Расул болгъанды. Таулу жаш самолёт элге тюшмез ючюн, аны бир жанына сюрюрге кюрешгенди. Аны хайырындан эллилени кеслерине, журтларына да хата жетмегенди. 

Самолёт къоннгандан сора алайгъа  излеу-къутхарыу отряд эмда МЧС-де къуллукъ этгенле мычымай жетгендиле. Биринчи билдириулеге кёре, самолёт бузулуп тюшгенди. Кёрген адамланы айтханларына кёре уа,  тюше туруп   бийик вольтлу ызлагъа тийгенди. Алай бла эки эл токсуз къалгъандыла.

Самолёт жашау юйлеге тюшмез ючюн, экипаж къолундан келгенни аямагъаныны юсюнден губернатор Игорь Кобзевге Къоруулау министерствону келечилери билдиргендиле. Регионну башчысы  ажымлы ёлген таулу жашны юйюрюне, жууукъларына да къайгъы сёз бергенди эмда алагъа тийишли болушлукъ этиллигин да айтханды. «Жантууланы Расулну усталыгъы, тирилиги да болмасала эдиле, самолёт, элге тюшюп, кёплеге  къыйынлыкъ, ёлюм да келтирлик эди»,-деп жазылады  «Усольские новости» газетни биринчи бетинде.

Холаланы Марзият.