НыбжьыщIэхэр зэпоуэ
Космонавтикэм и махуэр ягъэлъапIэу алыдж-урым бэнэкIэмкIэ щIыналъэхэм я зэхьэзэхуэ Налшык къалэм дэт «Налшык» спорт комплексым щрагъэкIуэкIащ. Хэгъэрейхэм нэмыщI, абы щызэпеуащ Къэрэшей-Шэрджэсым, Осетие Ищхъэрэ – Аланием, Шэшэным, Къалмыкъым, Адыгейм, Ставрополь крайм я спортсменхэр, псори зэхэту цIыху 300-м щIигъу. Республикэм и пщIэр зэхьэзэхуэм щаIэтащ Шэджэм, Тэрч, Лэскэн щIыналъэхэм, Жаным Аслъэн и цIэр зэрихьэу Налшык дэт спорт еджапIэм я бэнакIуэхэм.
«Спортым цIыхур хуегъасэ бэшэчагъым, хьэл-щэн дахэхэм, хэку лъагъуныгъэм. ЩIэблэ узыншэ, къарууфIэ диIэным и лъабжьэр аращ», - жиIащ зэхьэзэхуэм теухуауэ КъБР-м алыдж-урым бэнэкIэмкIэ и командэ къыхэхам (ныбжьыщIэхэмкIэ) и тренер нэхъыжь Урысмамбэт Алим.
МахуитIкIэ екIуэкIа зэIущIэхэм ехъулIэныгъэфIхэр щызэIэрагъэхьащ Жаным Аслъэн и цIэр зезыхьэ спорт еджапIэм и бэнакIуэхэм. Я хьэлъагъ елъытауэ зыхэта гупхэм дыщэ медалхэр къыщахьащ Щокъарэ Идар, Арзуманов Темырлан, Уэдыжь Имран сымэ. ЕтIуанэ хъуахэщ КъуэщIысокъуэ Азизрэ Жэрыгъу Астемыррэ. Ещанэр Соблыр Темырлан, Хъущтхэ Аслъэнбэчрэ Сэлимрэ сымэщ.
Кхъухьлъатэхэм зрагъэIэт
Къэбэрдей-Балъкъэрым и Аруан щIыналъэм щекIуэкIащ Урысейм и Кубокыр авиамодельнэ спортымкIэ къэхьыным хуэунэтIа зэхьэзэхуэм и япэ Iыхьэмрэ пашэныгъэр щыубыдынымрэ хуэгъэпса зэIущIэмрэ. Абы кърихьэлIащ ди къэралым и щIыналъэхэм ящыщу 35-м, Китайм, Узбекистаным, Къэзахъстаным, Ермэлым и лIыкIуэхэр.
Урысейм и Кубокми пашэныгъэр къэхьынымкIэ зэхьэзэхуэми япэ увыпIэхэр яубыдащ Нарткъалэ дэт, техник ныбжьыщIэхэм я станцым и гъэсэнхэм.
Абыхэм нэмыщI, мэлыжьыхьым и 8 - 13-хэм мы щIыпIэм щекIуэкIа, УФ-м авиамодельнэ спортымкIэ и чемпионатым япэ щыхъуащ Климов Максим икIи спортымкIэ мастерым и кандидат мардэхэр игъэзэщIащ. ЗэIущIэр къызэрахахыу щытащ, абы щытекIуахэр хагъэхьащ УФ-м и командэ нэхъыщхьэм икIи мы гъэм Узбекистаным щызэхэтыну «КъуэкIыпIэм и Кубок» зэпеуэм я зэфIэкIхэр щагъэлъэгъуэнущ.
КЪАНШЫУЕЙ Алим.
