Уллу Хорламны 80-жыллыгъына эмда Элбрусну немис-фашист аскерледен къоруулагъанлагъа  жораланып «Элбрус» курортда быйыл жайда эки жангы экология жол ачыллыкъды.  
Кёп болмай РФ-ни Президентини Шимал-Кавказ федерал округда толу эркинликли келечиси   Юрий Чайка, РФ-ни Экономиканы айнытыу министрини орунбасары Сергей Назаров бла Кавказ.РФ  институтну таматасы Андрей Юмшанов  ишчи тюбешиулерини кезиуюнде ол жолчукъла бла  шагъырейленнгендиле.  
Узунлукълары 5,6 эм 6,7 километрге жетген  «105-чи тикге жол» эм «Хорламны жолу» Юрий Чайканы башламчылыгъы бла къуралгъандыла. Ала экиси да Элбрусну къоруулагъанланы музейинден, 3500 метр бийикликден, башланадыла. Кеслери да жайда хайырланырча боллукъула.  
Быллай башламчылыкъны баш мураты – къонакълагъа бу тийреледе фашистле бла баргъан  кюйсюз къазауатладан тынгылы хапар билдириргеди эмда  патриот сезимлерин кючлергеди. 
Жаяу жюрюгенлеге тап болур ючюн, жолчукълада билдириу къангала тагъылгъандыла, тау блиндажла жангыртылгъандыла, кёзюлдюреуюкле, белгиле да салыннгандыла. 
Эсге сала айтсакъ: былтыр октябрьде Кавказ.РФ  институтну башламчылыгъы бла  Минги тауну этегинде Уллу Ата журт урушха аталгъан къараучу  майдан ачылгъан эди. Бюгюнлюкде ол Россейде  эм  бийикде орналгъан тарых-туризм объектге саналгъанын да  белгилерчады.