Республикабызны тауларында туристле жылны битеу кезиулеринде да солуйдула. Алай, жарсыугъа, араларында къоркъуусузлукъну жорукъларына тийишлисича кёл салмагъанла, кеслерини кючлерине асыры базыннганла да тюбейдиле, деп белгилейдиле МЧС-ни регионда бёлюмюнде. 

Альпинистле ажашханда неда къыйын болумгъа тюшгенде, къутхарыучула алагъа болушлургъа ашыгъадыла. Дайым да хазырлыкъда турурча уа ала юйрениулеге баргъанлай турадыла, бу жол къутхарыучула усталыкъларын Адыл-Сууда ёсдюргендиле, алагъа ырхы келгенден сора жоллары юзюлген альпинистлени къутхарыргъа борч салыннганды. Айтылгъаныча, солугъанладан бири, къаядан кетип, аягъын ачытханды. Къутхарыучула тау сууну башы бла жипле жиберип ётгендиле, къаялагъа ёрлегендиле, ачыгъаннга биринчи болушлукъну берип, энишге тюшюргендиле.  

Быллай юйрениуле, МЧС-ни Элбрус бийик тау излеу-къутхарыу бёлюмню башчысыны орунбасары халкъла аралы даражада къутхарыучу Хаджиланы Альберт айтханыча, службаны келечилерини бийик таулада бла къаялада ишлеуде сынамларын ёсдюрюр муратда къураладыла. Алагъа он къутхарыучу къатышханды.

Кульчаланы Зульфия.