Къабарты-Малкъарны премьер-министри Мусукланы Алий КъМР-ни Правительствосуну юйюнде «Мастерконцепт» деген австриялы консалдинг эмда инжиниринг компанияны таматасы Гернот Ляйтнер бла тюбешгенди. Ушакъны кезиуюнде туризмни, инфраструктураны айнытыу, спорт, тау-лыжа, адамла солугъан объектлени проектлерин жарашдырыу, регионда кемпинг-паркла къурау жаны бла бирге ишлеуню жоллары сюзюлгендиле.
-Туризм Къабарты-Малкъарны экономикасыны файдалы кесегинден бириди. Аны айнытыр онгланы табийгъат кеси саугъалагъанды. Арт жыллада туристлени, ата журтлу эмда тыш къыраллы спортчуланы араларында да республиканы жаратханла кёпден-кёп бола барадыла,-дегенди Мусукланы Алий.
Сёлешиулени кезиуюнде Гернот Ляйтнер компания Къытайда, Японияда, Россейде, Къазахстанда эмда башха къыраллада да компания бардыргъан халкъла аралы проектле бла шагъырей этгенди. Аланы араларында Къытайны инвестиция фондлары бла бирге толтурулгъан программала, Сочиде Олимпиада оюнланы, Алма-Атада футболдан дунияны чемпионатыны къурау комитетлери бла этилген келишимле, Москвада «Экстрим-парк» тау-лыжа комплекслени бла Санкт-Петербургда «Охта» альпий паркны архитектура-къурулуш проектлери бардыла.
Тюбешиуге КъМР-де баш федерал инспектор Тимур Макоев, КъМР-ни Правительствосуну Председателини биринчи орунбасарыны къуллугъун толтургъан Мурат Керефов, КъМР-ни курортла эм туризм министрини къуллугъун толтургъан Мурат Шогенцуков да къатышхандыла.