РусГидро компанияны Къабарты-Малкъарда бёлюмю жаз башында черекле кётюрюлюп келген кезиуге хазырланып башлагъанды. Тийишли жумушла тамамланнганына контроль этиу муратда энчи комиссия къуралгъанды. Ары республиканы контроль-надзор органларыны эмда компанияны кесини келечилери киредиле. Гидроэлектростанцияланы мекямларын суу хата келтирмезча хазырларгъа деп этиллик ишлени планы жарашдырылгъанды.

Сагъынылгъан кезиу май айда башланыучуду. Ары дери бир ненча техника жумушланы тамам этерге керекди. Гидротехника объектлеге аслам эс буруллукъду, дагъыда станцияланы хар биринде да аварияла болгъан кезиуледе ишни къолгъа аллыкъ бригадала къураллыкъдыла.

«Къоркъуулу кезиуде черекледе, ГЭС-леде болумну юсюнден жер-жерли власть органлагъа эмда сейирлери болгъан организациялагъа толу информация берилгенлей туруллукъду», - деп билдиргендиле компанияны пресс-службасындан.

Омарланы Мурат.