Къабарты-Малкъарны Ветеринария управлениясында алгъаракъда ётген коллегияда бу ведомствону былтыргъы ишини эсеплерин чыгъаргъандыла эмда быйылгъа борчланы юсюнден да сёлешгендиле. Жыйылыугъа республиканы Правительствосуну Председателини биринчи орунбасары Сергей говоров, талай ведомствону эмда илму учрежденияны башчылары бла келечилери да къатышхандыла.

Управленияны  таматасы Аслан Арамисов айтханнга кёре, ведомствону не заманда да баш борчу – регионда эпизоотия болумну таплыгъын, малчылыкъ продукцияны къоркъуусузлугъун жалчытыуду, адамланы мал аурууладан къоруулауду.

Республикада санитария-эпизоотия таплыкъны жалчытыр умутда былтыр  маллагъа бла юй къанатлылагъа аслам халда вакцинация этилип тургъанды. Аны бла тийишли план жик-жиги бла толтурулгъанды.

Юй къанатлыла жукъгъан кесекле бери жетмезча эмда жайылмазча иги кесек мадар этилгенди. Бу ишге Россельхознадзорну Шимал Кавказда регионла аралы управлениясы, тийишли предприятияланы башчылары да къатышхандыла, жарашдырылгъан план а РФ-ни Эл мюлк министерствосуна бла Россельхознадзорну ара аппаратына жиберилгенди.

Былтыр 1 мартда Къабарты-Малкъарда «Ветеринарияны юсюнден» законнга кийирилген жангы жорукъ ишлеп башлагъанды. Сёз анда маллагъа белги салыу эмда аланы эсеплеуню юсюнден барады. Бу ишни аланы иелери кеслери тамамларгъа керекдиле, белгилени да бир ненча тюрлюсюн хайырланыргъа жарайды.

Къырал ветеринария служба малланы бла къанатлыланы аслам тюрлюлерин «Хорриот» деген системагъа эсепге салады. Аны юсюнден сагъыннганда, Аслан Арамисов  регионда ветеринария жаны бла таплыкъны жалчытыуда диагностика лабораторияланы ишлерине бийик магъана бергенди. Былтыр ала битеу да 700 мингден артыкъ тинтиу бардыргъанларын чертгенди.

Малчылыкъ продукцияны къоркъуусузлугъун жалчытыуда ветеринария-санитария лабораторияланы къошумчулукълары уллуду. Республиканы аш-азыкъ рынокларында былтыр ала тинтген продукцияны саны алты миллиондан артыкъ болгъанды.

Управленияны быйыл да иши кёпдю. Ары  ол санда  сагъынылгъан баш борчланы тамамлау, менеджмент системаны сингдириу, 40 специалистни билимлерин кючлендириу, дезинфекция установкасы болгъан бир автомашинаны эмда мобильный лабораторияны сатып алыу жумушла киредиле.

Ахырында Аслам Арамисов КъМР-ни Башчысы Казбек Коковха, республиканы Правительствосуну Председатели  Мусукланы Алийге  ала ветеринария службаны мюлк-техника онгларын кючлендирирге себеплик этип тургъанлары ючюн ыразылыгъын билдиргенди.

Улбашланы Мурат.