Бу кюнледе "Жашау этерге  инфраструктура" миллет проектге кёре 3,6 километр чакълы бирде  къырал сетьлеге кирген  "Нальчик-Майский"  жолгъа тынгылы  ремонт этип кюрешедиле, деп билдиредиле КъМР-ни Транспорт эмда жол мюлк министерствону пресс-службасындан.

Сагъынылгъан объектни 2019 жылда жангыртып башлагъандыла.  Ол заманда 2 километр кесеги тап халгъа келтирилгенди. Ызы бла 2020 жылда  10 километри мардалагъа келиширча болгъанды. Андан сора да,  2022 жылда жолну Нальчикге къошулгъан жерине, ол санда Къабарты орамны 4,6 километрине тынгылы ремонт этилгенди.  Быйыл сагъынылгъан участок  толусунлай жангы излемлеге келиширча боллукъду. 

Бюгюнлюкде  жолну мурдорун кючлеп, эски   бардюрланы кетерип кюрешедиле.  Аны чеклеринде  жауун суу саркъырча арыкъла бла быргъыла саллыкъдыла, къоркъуусузлукъну жалчытырча мадар да этилликди.   Черек сууну кёпюрюн да  кючлерикдиле. Жаяу жюрюгенлеге тротуарла ишленирикдиле эм темир буруула  тартыллыкъдыла.

Планнга кёре, жол быйыл жайны ахырына хайырланыргъа берилликди.

Сагъынылгъан проектге кёре, «Новопавловск – Прохладный – Моздок»

жолну да  6,5 километр кесегине  тынгылы ремонт этиледи. Ол да къыралны сетьлерине кирген магъаналы объектди. Ишлени кезиуюнде Прохладный шахарны Магистральная  бла  Первомайская орамлары да жангыртыллыкъдыла.
Бусагъатда специалистле зыгъыр, юзмез  къуюп   жолну мурдорун кючлейдиле. Ызы бла эки къат асфальт жаярыкъдыла, тротуарла, улоу тохтарча жерле жарашдырыллыкъдыла эм темир буруула да тартыллыкъдыла.

Объект быйылны ахырына битерге керекди. Экинчи жылда уа  Ставрополь край бла чекден Солдатскае станицагъа дери кесеги да  жангыртыллыкъды. Быллай амал транспорт тыйгъычсыз жюрюрча эм къоншу регионла бла байламлыкъ  бютюн бек  кючленирча онг берликди . 
Эсге сала айтсакъ, миллет  проектни чеклеринде  объектлени игилендириу жаны бла ишлеге Битуроссей халкъ фронтну (ОНФ) бёлюмюню  келечилери да дайым кёз-къулакъ болгъанлай турадыла. Ол санда жангы технологияла эм иги материалла хайырланырларына эс бурадыла эм кемчиликлени кетерирча эсгертиуле бередиле.

 Бу жол жамауатчыла ведомствону келечилери бла бирге  Шимал-Осетия бла чекде орналгъан  «Дейское - Тёбен Курп"жолда ишле бла шагъырейленнгендиле.  Аны узунлугъу 5,8 километрге созулады эм Тёбен Курп элни ичи бла ётеди. Объект Къабарты-Малкъарны, Шимал Осетияны эм Ингушетияны байлагъан магъаналы артериягъа  саналады.

ОНФ-ни келечиси  Изабелла Косумова,Терк районда жолланы жангыртыугъа башчылыкъ этген  Назир Масаев эм ишлени игилигине контроль  бардыргъан Ахматланы Алим объектде ишле ишлеге бюсюрегендиле. Болсада мында жумушла бошалгъынчы тынчайыргъа жарамазлыгъын да белгилегендиле.  

 Бусагъатда объектни мурдорун кючлеп бошай турадыла. Ызы бла жауун суу саркъырча арыкъла бла быргъыла саллыкъдыла. Ахырында  юч къат асфальт жаярыкъдыла, жорукъланы билдирген  тийишли белгиле саллыкъдыла эм ызла да тартырыкъдыла. 

Курданланы Сулейман.