КъМР-ни Правительствосуну кезиулю жыйылыуун премьер-министр Мусукланы Алий бардыргъанды. Министрлени кабинети къырал кадастр багъалагъа кёчюуню кюнюн белгилегендиле, къырал программаланы жарашдырыуну, толтурууну эм аланы файдалылыкъларын тергеуню низамына тюрлениуле да кийиргендиле.
Биринчиден, РФ-ни Финансла министерствосу бла къошакъ келишим сюзюлгенди. Финансла министрни къуллугъун толтургъан Елена Лисунну айтханына кёре, анда сёз федерал бюджетден кредит алыуну юсюнден барады.
«Къырал кадастр багъаланы юсюнден» федерал законнга тийишлиликде, республика 1 ноябрьден къырал кадастр тергеуню жангы низамына кёчеди. КъМР-ни къырал программаларын жарашдырыуну, толтурууну эм аланы файдалылыкъларын тергеуню низамына тюрлениулеге да къаралгъанды. Экономиканы айнытыу министрни орунбасары Хусен Тимижевни айтханына кёре, документ стратегиялы планны юсюнден законнга тийишлиликде чыгъарылгъанды. Анда къырал программаланы жамауат тынгылаулада сюзюуню низамы, башха жумушла да кийирилгендиле.
КъМР-ни Правительствосу 2018 жылда 24 августда чыгъаргъан 500-рп номерли буйрукъгъа тюзетиулеге да къаралгъанды. Хусен Тимижев билдиргенича, алай бла КъМР-ни инвестиция стратегиясы жангыртылады. Документ республиканы узакъ болжалгъа айнытыуну стратегиясы эмда социал-экономикасыны прогноз планы бла келишдирилгенди.
«КъМР-де эл мюлкню айнытыу, эл мюлк товарла, аш-азыкъ затла сатылгъан рынокланы бир низамгъа келтириуню юсюнден» къырал программагъа тюзетиуле бла жыйылгъанланы Правительствону башчысыны биринчи орунбасарыны къуллугъун толтургъан Сергей Говоров шагъырей этгенди.
Ол айтханыча, проект Правительствону 2019 жылда 3 июльда бардырылгъан жыйылыуунда этилген протокол буйрукъгъа тийишлиликде жарашдырылгъанды. «Алай бла къырал программа 2020 жылгъа дери ишлегени тохташдырылады. Андан сора да, тюрлениулеге кёре къумалы малчылыкъны айнытыугъа 3,9 миллион сом бёлюнеди»,-дегенди ол.
Ызы бла уа «КъМР-де эл мюлкню айнытыу, эл мюлк товарла, аш-азыкъ затла сатылгъан рынокланы бир низамгъа келтириуню юсюнден» жангы къырал программа къабыл кёрюлгенди. Ол 2021-2025 жыллада ишлерикди.
КъМР-ни Правительствосу 2016 жылда 8 июльда чыгъаргъан 361-рп номерли буйругъу кючюн тас этгени тохташдырылгъанды. Премьер-министрни орунбасарыны къуллугъун толтургъан Владимир Болотоковну айтханына кёре, анда бюджет предприятияла коммунал жумушла ючюн тёлеулени низамы белгиленипди. Болсада тёлеулени электрон халда бардырыуну жорукълары кийирилгенлери бла буйрукъ кючюн тас этгенди.
Узакъ болжаллы къырал келишимлени бегитиуню юсюнден правительстволу бегимге да къаралгъанды. Къурулуш эм жол мюлк министрни къуллугъун толтургъан Вячеслав Кунижевни айтханына кёре, документ «КъМР-де жол мюлкню айнытыуну битеулю мадарланы юсюнден» регион проектде белгиленнген жумушланы тамамлар мурат бла жарашдырылгъанды.
Борчлу халда медицина страхованияны жер-жерли фондуну бюджетине да этилгендиле тюзетиуле. Саулукъ сакълау министрни орунбасары Беслан Назранов белгили этгенича, тюрлениуле трансфертле кёбейтилгенлери бла байламлы кийириледиле. Алай бла фондну 2019 жылда бюджетини къоранчла бёлюмюне 20 миллион сом къошулады. Аны файдалары 9,193 миллиард сом болгъанды, къоранчла уа 9,465 миллиард сомгъа жетгендиле.
«КъМР-де саулукъ сакълауну айнытыуну юсюнден» къырал программа да къабыл этилгенди. Ол 2021-2025 жыллада ишлерикди. «Документ РФ-ни Президетини 2018 жылда 7 майда къабыл этген 204 номерли указында белгиленнген борчланы бла жумушланы чеклеринде жарашдырылгъанды. Кеси да 6 бёлюмден къуралгъанды, ол санда жеринде медицина-санитар болушлукъну айнытыу, къан тамыр-жюрек, онкология ауруулагъа къажау, сабийлени багъыуну айнытыу, саулукъ сакълауну бирикдирилген цифралы системасын къурауну, саулукъ сакълау учрежденияланы билимли кадрла бла жалчытыуну программалары киредиле»,-дегенди Беслан Назранов.
Жыйылыуда башха соруула да сюзюлгендиле. Ол санда Саулукъ сакълау министерствону Болумуна тюзетиуле да кийирилгендиле.
