Уллу Хорламны 80-жыллыгъына эм КъМР-ни биринчи президенти Валерий Коковну хурметине «Россейни ДОСААФ»-ы  жамауат-къырал организацияны регион бёлюмю машинаны терк эмда уста  жюрютюуден  эришиуле ётдюргенди.

Бёлюмню пресс-службасындан билдиргенлерине кёре, алгъадан бу эришиулени Ата журтну къоруулаучуну кюнюнде бардырыр акъыл бар эди. Алай, кюнню халы бла байламлы, аны 15 мартха кёчюрюп, Прохладный шахарда ётдюргендиле. 

Эришиуле  ачыкъ бардырылгъанлары  себепли, анга, ДОСААФ-ны келечилеринден сора да тыш командала да къатышхандыла. Мында, машинаны терк жюрютгенден тышында, илишаннга атдырыу да магъаналыды. Алай бла эришиулеге къатышхан хар бир спортчу да машинаны жюрютюуде усталыгъын кёргюзтгенди эм 3 илишаннга ушкокдан атдыргъанды. 

Алай бла бек иги кёрюмдюню ДОСААФ-ны Нальчик шахар бёлюмюню спорт-техника арасыны командасы болдургъанды. Экинчи жерге Прохладнаны «Класс» деген автомобиль школуну къаууму чыкъгъанды. Ючюнчюле да прохладначыла болгъандыла – шахарны автомобиль школну келечилери Александр Холоденко бла Виктор Гофман.

Бу эришиуледе энчи зачёт республикалы ДОСААФ-да, теориядан сора да, билимлерин жашауда хайырланыугъа энчи магъана берилгенин кёргюзтгенди. Алай бла, эр кишилени бла тиширыуланы араларында автомобиль жюрютюуден инструктор Руслан Скиба бла Нальчикни бирикдирилген техника школуну юйретиучюсю Залина Хатшукова алчыла болгъандыла. 

Юсюбюздеги жылда энтта быллай эки эришиу ётдюрюллюкдю. 

Къасымланы Аминат.