Орта кюн Акъ-Сууну мектебинде Малкъар халкъны  къыраллыгъы  къайтарылгъан кюннге аталып  байрам болгъанды. Анга  къараргъа эллиле, устазла, школчула да келгендиле.  Чакъырылгъан къонакъла да бар эдиле. Аланы араларында КъМР-ни  халкъ поэтлери Созайланы Ахмат, Беппайланы Муталип, журналист, жазыучу Османланы Хыйса, искусстволаны  2-чи номерли  школуну директору Айшат  Кунижева, андан сора да, жырчыланы къаууму – Тёппеланы Жамиля, Бийланы Аслан, Аппайланы Ислам, Этчеланы Ислам. 

Бардыргъанла уа мектепни тамата  классларыны окъуучулары эдиле. 

Жыйылгъанланы къонакъла бла  шагъырей этгенден сора, жырчыла бирер, экишер жыр айтдыла. Адамла аланы узакъгъа созулгъан  къарсла бла ашырдыла. Аладан сора школчула жырладыла,  Къулийланы Къайсынны, Маммеланы Ибрагимни назмуларын айтдыла, тепсеген да этдиле. 

Акъ-Сууну сабийлери ана тилде  ариу, шатык окъудула назмуланы. Устазла алагъа уллу къыйын  салгъанлары кёрюнюп тура эди. Тюбешиуге Нальчикни алтынчы  номерли школуну окъуучулары да келген эдиле, ала да байрамгъа къууат къоша, тепсеулерин кёргюзтгендиле. 

Байрамны  концерт программасы бошалгъандан сора, Созайланы Ахмат сёлешгенди:  «Бек сюеме элими, журтуму.  Бюгюннге дери биз ана тилибизни сакълап келгенбиз. Мындан  арысында уа сиз сакъларгъа керексиз аны. Бюгюн назмула окъугъаныгъызча, сёлешген да алай этсегиз, бир заманда тилигизни унутурукъ тюйюлсюз. Тили болмагъан миллет миллет тюйюлдю. Аны эсигизде тутугъуз».

Жыйылгъанланы жетип келген байрам бла Беппайланы Муталип   да алгъышлагъанды. Ызы бла элни администрациясыны башчысы  Гергъокъланы Тимур тюбешиуге келгенлеге саулукъ-эсенлик тежегенди. 

Ахырында кёчгюнчюлюкде болгъан  Бачиланы Лиза сёлешгенди: «1957 жылда  «Коммунизмге жол» газетни  жууукъларым бизге, Къазахстаннга, почта бла жиберген эдиле. Элибизде мен аны  кёргюзтмеген адам къалгъан болмаз эди. Андан сора да,  аны манга почта бла ашырып тургъандыла. Андан 1958 жылда къайтхан эдик туугъан жерибизге.  Ол жылдан башлап бюгюннге дери тилибизде чыкъгъан газетни, журналланы алгъанлай турама. Кесим да  окъуйма, сабийлеге, туудукълагъа да окъутама. 

Сиз да алыгъыз аланы. Газетибиз, журналларыбыз, радиобуз, телевидениябыз, театрыбыз болгъаны бизни къыраллыгъыбызны, халкълыгъыбызны шартларыдыла. Ол шартларыбыз бла ёхтемлене, тамблагъы кюннге, ёсюп келген тёлюге ышанабыз». Бу байрамны Этчеланы Музафар бла Атмырзаланы Расул хазырлагъандыла.

Лейлун улу Х.