Бу ыйыкъда Элбрус муниципал районну жер-жерли самоуправлениясыны советини 37-чи сессиясы болгъанды.

Анда озгъан 2024  жылда районну социал-экономика жаны бла айныууну эсеплери сюзюлгендиле,  2025  жылгъа борчланы бла толтуруллукъ жумушланы белгилегендиле.  Аны ишине КъМР-ни урунуу эм социал къоруулау министри Тогъузаланы Тахир бла КъМР-ни Парламентини депутаты Сотталаны Къурман, районну организацияларыны таматалары бла келечилери къатышхандыла.

Сессияны жер-жерли самоуправленияны советини председатели Тохаланы Хыйса бардыргъанды. Озгъан жылны ичинде  совет жалчытхан ишлери бла  аны  председателини орунбасары Джаппуланы Руслан  жыйылгъанланы шагъырей этгенди. Районну социал-экономика жаны бла айныууну юсюнден  Элбрус муниципал районну администрациясыны башчысы Отарланы Мухтар, билим бериуде эсепле бла уа районну Билим бериу управлениясыны таматасы Атаккуланы Нуржан сёлешгендиле.

 Советни комиссияларыны ишлерини юсюнден да айтылгъанды. Бюджет, финансла, жер-жерли налогла эм аланы жыйыу жаны бла комиссияны председатели Атмырзаланы Марат  комиссияны 2024  жылда бардыргъан ишини юсюнден билдириуюн туура этгенди,  эм магъаналы жангырыуланы  бла проектлени да  энчи чертгенди. Районну Контроль-эсеплеу палатасыны таматасы Будайланы Шамил бла тиширыуланы советини таматасы Моллаланы Зарета озгъан жыл бардыргъан ишлерини юсюнден сёлешгендиле.

Районну тиширыуларыны советини келечилерин а ол кюн,  тири граждан ниетлери, районну тиширыуларыны къымылдаууну айныууна салгъан уллу къыйынлары ючюн да,  махтау, ыразылыкъ къагъытла бла саугъалагъандыла.

Повесткагъа салыннган соруула барысы да тинтилгендиле, алагъа кёре керекли эм тийишли оноула этилгендиле

Аны юсюнден бизге районну администрациясыны пресс-службасындан  Холамханланы Алина билдиргенди.

Темуккуланы Асият.