Гъатхэпэм и 27-м Налшык щагъэлъэпIащ Театрым и лэ­жьакIуэхэм я дунейпсо махуэр. Пшыхь гуапэр къызэригъэпэщащ УФ-м и Театр лэ­жьакIуэхэм я зэгухьэныгъэм и Къэбэрдей-Балъкъэр къудамэм.

КъБР-м щэнхабзэмкIэ и министрым и къуэдзэ Карчаевэ Iэминэ зи махуэр зыгъэлъапIэхэм псалъэ гуапэхэмкIэ захуигъэза нэужь, зи лIыкIуэ ­министерствэм къыбгъэдэкI щIыхь тхылъхэр зыхуагъэфэща артистхэмрэ режиссёрхэмрэ яритыжащ. 
УФ-м и Театр лэжьакIуэхэм я зэгухьэныгъэм и правленэм и щIыналъэ къудамэм и унафэщI Фырэ Майе артистхэм я махуэшхуэмкIэ ехъуэхъуащ узыншагъэ, дэрэжэгъуэ, ехъулIэныгъэ яIэну, театр гъуазджэм ­дя­пэкIи хэлъхьэныгъэфIхэр ­хуа­щIыну. Ар къеджащ ехъу­лIэ­ныгъэфIхэр зыIэрызыгъэхьахэм щIыхь тхылъхэр зэрыхуа­гъэфэщам теухуа унафэм. Къи­нэмыщIауэ, абы къипщытэжащ «Илъэсым и театр лэжьыгъэ нэхъыфIхэр» зэпеуэм кърикIуар. Я цIэ къриIуащ «ЦIыхухъу роль нэхъыфI» Iы­хьэм пашэу къыщалъыта ­Мирзоев СулътIан («История одного актера» спектаклыр), Блашэ Имран («Укрощение строптивой» спектаклыр), Гогуев Арафат («Вот тебе и инопланетянин» спектаклыр) сымэ.
ЕтIуанэ планым и «ЦIыхухъу роль нэхъыфI» Iыхьэм къыщы­хэжаныкIахэщ Семэн Астемыр, Хьэжмэт Iэдэм, Хьэщхъуэжь Ислъам («Укрощение строптивой»), Бичиев Хьэжыдаутрэ Мисиров Жемалрэ («История одного актера»), Ораков Замир («И жизнь, и слезы, и любовь...»), Мизиев Аубекир («И жизнь, и слезы, и любовь...»), Абей Рустамрэ Жубоев Жамбулэтрэ («Силь­ва»). 
 «ЦIыхубз роль нэхъыфI» Iыхьэм пашэ щыхъуахэщ Що­джэнцIыкIу Алий и цIэр зезыхьэ Къэбэрдей къэрал дра­мэ ­театрым и артисткэ МафIэдз Заирэ («Ябгэр зэрагъэ­Iэсэр» спектаклыр), Къул Ланэ («Снеж­ная королева» мюзиклыр), ДыщэкI ФатIимэ ­(«Сильва» опереттэр). 
ЕтIуанэ планым и «ЦIыхубз роль нэхъыфI» Iыхьэм щыте­кIуащ ПащIэ Маринэ («Поцелуй луны» макъамэ теплъэгъуэ). 
«Сценографие нэхъыфI» унэ­тIыныгъэм щытекIуащ Жы­лэ Къантемыр («Снежная королева»).
«Дуэт нэхъыфI» Iыхьэм пашэ щыхъуащ Толстовэ Мариерэ Нэгъуей Зауррэ («И жизнь, и сле­зы, и любовь...»), Мэкъуауэ Астемыррэ Павловская Аннэрэ («Снежная королева»).
Фырэ Майе КъБР-м и Театр лэжьакIуэхэм я зэгухьэныгъэм зэрыхагъэхьам щыхьэт техъуэ тхылъхэр зэхыхьэм щаритыжащ республикэм и театрхэм я лэжьакIуэхэу IэнатIэм пэрыхьагъащIэхэм. КъищынэмыщIауэ, Театрым и дунейпсо махуэм ири­хьэлIэу щIыхь, фIыщIэ тхылъхэмрэ саугъэтхэмкIэ игъэ­­лъэпIащ мы гъэм зи юбилей      артистхэр, ­гъу­аз­джэм и лэ­жьа­кIуэ пажэ­хэр.
- Щэнхабзэм ди гъащIэм къы­п­хуэмылъытэну мыхьэнэшхуэ щиIэщ, абы хэлъхьэныгъэ хуэ­зыщIхэм, зезыгъэужьхэм фIы­щIэ, щытхъу псалъэ куэд яхуэфащэщ, - жиIащ КъБКъУ-м уэ­рэ­дымрэ къафэмкIэ и «Амикс» театрым и художественнэ унафэщI, режиссёр Iэзэ Къул Амир.
Пшыхьыр ягъэдэхащ республикэм и уэрэджыIакIуэ, къэфакIуэ цIэрыIуэхэм. 
Сурэтхэр 
Къарей Элинэ трихащ.

ТЕКIУЖЬ Заретэ.