КъБР-м и Парламентым и депутатхэр, «Къэрал сыхьэтым» хыхьэу, яIущIащ республикэм и курыт еджапIэхэм я психолого-педагогикэ классхэм щеджэхэм.
Налшык къалэм, Бахъсэн, Дзэлыкъуэ, Прохладнэ районхэм я ныбжьыщIэ 60-м щIигъу ирагъэблэгъат зэхуэсым. Абыхэм зыщрагъэплъыхьащ республикэм и хабзэубзыху IуэхущIапIэ нэхъыщхьэм. НыбжьыщIэхэм къаIущIащ КъБР-м и Парламентым Лъэпкъ зэхущытыкIэхэмкIэ и комитетым и унафэщIхэм ящыщ, Законодательствэмрэ щIыпIэ унафэр зехьэнымкIэ комитетым и унафэщIым и къуэдзэ Джатэ Руслан. Депутатыр щIэупщIащ щIалэгъуалэм я ехъулIэныгъэхэм, ахэр дэзыхьэххэм, икIи дэтхэнэри къыхуриджащ жыджэру щIыналъэм и жылагъуэ Iуэхухэм хэтыну.
ЗэIущIэр къыщызэIуихым, КъБР-м и Парламентым ЕгъэджэныгъэмкIэ, щIэныгъэмкIэ, физическэ щэнхабзэмкIэ, спортымрэ щIалэгъуалэм я IуэхухэмкIэ и комитетым и унафэщI Емуз Нинэ къыхигъэщащ, республикэм Егъэджэныгъэмрэ щIэныгъэмкIэ и министерствэм игъэбелджыла Iуэхухэм ящыщу, 2024 гъэм и дыгъэгъазэм математикэмрэ информатикэмрэ, физикэр, химиер, биологиер, тхыдэмрэ обществознаниемрэ щхьэхуэ-щхьэхуэу школхэм щрагъэджыным иужь зэрихьар икIи ар зэрыщхьэпэр. «Мы Iуэхур щIыналъэм дежкIэ сэбэпщ, дызримыкъу IэщIагъэлIхэр пасэу дгъэхьэзырыну Iэмал къыдетри, - жиIащ Емузым. - Ди зэхуэсым нобэ къедгъэблэгъахэр а программэ гъэщIэгъуэным хэхуахэращ. ИкъукIэ мыхьэнэшхуэ иIэу къызолъытэ ныбжьыщIэхэм ЕгъэджакIуэхэм я Iэзагъэм щыхагъахъуэ IуэхущIапIэм и IэщIагъэлIхэр къазэрыдэлажьэми. Нобэ психолого-педагогикэ унэтIыныгъэм ирилажьэхэр дрикъуркъым, абы къыхэкIыу дыхуейщ курыт школым иджыри фыщIэсу IэщIагъэр зищIысым зыщывгъэгъуэзэ-ну, абы фыхуэхьэзыру еджапIэ нэхъыщхьэм фыщIэтIысхьэну. ЕгъэджакIуэм цIыхум и гъащIэр зыхуэдэ хъунум теухуауэ къалэнышхуэ егъэзащIэ, псом хуэмыдэу здиунэтIыну гъуэгумрэ къыхихыну IэщIагъэмрэ ехьэлIауэ. Аращ нобэ апхуэдэ гулъытэ мы Iуэхум щIыхуащIыр».
КъБР-м и Парламентым Къэпщытэныгъэмрэ регламентымкIэ и комитетым и унафэщI Кансаевэ Еленэ ныбжьыщIэ-хэм яхутепсэлъыхьащ щIыналъэм и хабзэубзыху IуэхущIапIэм и зэхэлъыкIэмрэ илэжьхэмрэ. Абы къызэхуэсахэр щигъэгъуэзащ мы зэманым КъБР-м и Парламентым и ебланэ зэхуэсыщIэр зэрылажьэм, хэтхэр иджыблагъэ процент 40-кIэ зэрызэрахъуэкIам, щIалэщIэхэр зэрыхагъэхьам. Къыхигъэщащ депутат 70 зэрылажьэр, абыхэм СВО-м хэта щIалитI зэрыхагъэхьар. Кансаевэ Еленэ щхьэхуэу тепсэлъыхьащ КъБР-м и Парламентым и комитет 11-мрэ Лъэпкъ зэхущытыкIэхэмкIэ комитетымрэ я пщэрылъ нэхъыщхьэхэм, IуэхущIапIэм епха ЩIалэгъуалэ палатэмрэ Жылагъуэ советымрэ ягъэзащIэ къалэным.
ЩIалэгъуалэм яIущIахэм ящыщт ЕгъэджэныгъэмкIэ, щIэныгъэмкIэ, физическэ щэнхабзэмкIэ, спортымрэ щIалэгъуалэм я IуэхухэмкIэ комитетым хэт, депутатхэм нэхъыщIэ дыдэу яхэт (илъэс 28-рэ хъууэ аращ), дзэ Iуэху хэхам и ветеран Шевчук Герман. Ар щIалэгъуалэм яхутепсэлъыхьыжащ къикIуа гъуэгуанэмрэ зыхэта гъэунэхуныгъэхэмрэ. ЩIалэм жиIащ Налшык къалэм и курыт еджапIэ №6-р къызэриухар, адэкIэ Хэкум къулыкъу зэрыхуищIар. Шевчук Герман и ныбжьыр илъэс 23-м щегъэжьауэ хэтащ дзэ Iуэху зэмылIэужьыгъуэхэм, зэпэщIэтыныгъэ гуащIэхэм. ИлъэситхукIэ абы Таджикистаным къулыкъу щищIащ, иужькIэ гуп унафэщIу щытащ, Урысеймрэ Таджикистанымрэ я зэпсэлъэныгъэхэр шынагъуэншэу екIуэкIынымкIэ къэралым пщэрылъ къыщищIыр игъэзащIэу. «ЗэрысхузэфIэкIкэ си къалэныр згъэзэщIащ. Зэман нэхъ гугъу дыдэхэм деж зыхэсщIэрт си щIыбагъ унагъуэр, Къэбэрдей-Балъкъэрыр, Урысейр къы- зэрыдэтыр. Арат сыт щыгъуи къару къысхэзылъхьэжыр», - къыхигъэщащ абы. СВО-м щыIэу, ар плIэ уIэгъэ хъуащ, иужьым къигъэзэжащ. ЩIалэм зэрыжиIэмкIэ, Хэкум, цIыхум хуэлэжьэнращ депу-тат къулыкъум пэрыхьэныр къызыхэ- кIар. Депутатым ныбжьыщIэхэр къыхуриджащ къимыкIуэту я хъуэпсапIэхэр зрагъэхъулIэну.
КъБР-м и Парламентым и Аппаратым и унафэщIым и къуэдзэ Хьэмыкъуэ Аслъэн тепсэлъыхьащ законхэр зэрырагъэфIакIуэм, республикэм и хабзэубзыху IуэхущIапIэм и жэрдэмхэм УФ-м и Къэрал Думэм къару зэрыщагъуэтым, нэгъуэщIхэми.
ЕджакIуэхэри депутатхэм куэдымкIэ еупщIащ, цIыхухэм зэраIущIэ щIыкIэм, къыхалъхьэ жэрдэмхэр зыхуэдэм, н.къ. теухуауэ. Апхуэдэуи езы ныбжьыщIэхэр тепсэлъыхьащ я районхэм щыIэ школхэм я Iуэхур зытетым, зэреджэм.
Депутатхэр ныбжьыщIэхэм ехъуэхъуащ, ехъулIэныгъэхэр яIэну, я гум фIэфI IэщIагъэ зрагъэгъуэтыну зэрагуапэр къыхагъэщу.
БАГЪЭТЫР Луизэ.
