Кёп болмай Тырныауузда Элбрус районда озгъан жылны эсеплерин чыгъарыугъа, муниципалитетни социал-экономика жаны бла айныууну жолларын белгилеуге жораланнган жыйылыу бардырылгъанды. Анда хар бёлюм ючюн жууаплы болгъанла билдириуле этгендиле. Ол санда районну Физкультура эм спорт комитетини спорт школларыны ишлерини, спортчуланы жетишимлерини эм жангы спорт мекямланы къурулушларыны юслеринден да сёз баргъанды. Район администрацияны башчысы Отарланы Махти былтыр районда тюрлю-тюрлю даражалы эришиуле аслам бардырылгъанларын эм спортчула да чемпионатлада жетишимле болдургъанларын чертип айтханды.
Белгилисича, мында ауур атлетика, тутушуу, карате айныпдыла. Ала бла кюрешген къызла бла жашла ахшы кёрюмдюле болдургъанлай келедиле. Алай бла былтыр ауур атлетле Россейни бла республиканы чемпионатларында 3 «алтын», 6 «кюмюш» эм 6 «доммакъ» алгъандыла; боксчула 2 «алтын», 4 «кюмюш» эм 6 «доммакъ» бла къууандыргъандыла: каратечиле 2 «алтын» эм 4 «кюмюш», грек-рим тутушуу бла кюрешген жашла да 2 «алтын», 2 «кюмюш» эм 4 «доммакъ» къоллу болгъандыла. 
Районну тийресинде бардырылыучу тёрели эришиуле да иги кесек спортчуну жыядыла, деп белгилегенди докладчы. Минги тауну этегинде ётгенлени араларында Россейни альпинизмден чемпионатын белгилерчады. Мында дагъыда велоспортдан, чабышыудан, бильярддан да эришиуле кёплени сейирлерин къозгъагъандыла. 
Жаш тёлюге саугъагъа деп жангы спорт объектле да ишленедиле. Аладан бири 2024 жылны декабрь айында Элбрус элде хайырланыргъа берилгенди. Аны спортчула, тренерле да эрттеден бери сакълай эдиле. Энди уа жарауларын аламат онгла къуралгъан комплексде бардырадыла. 
Алай бла бюгюнлюкде районда спорт айныйды, жетишимлиди, деп таукел айтыргъа боллукъду. 

Таппасханланы Аминат.