КъМР-ни Башчысы Казбек Коков республиканы Правительствосуну, толтуруучу властьны федерал органларыны регион управленияларыны, район администрацияланы таматалары бла кенгеш бардыргъанды. Анда социал сферада бла экономикада болумну юсюнден сёлешиннгенди. Быйылны 9 айында регионну айнытыуну эсеплери сюзюлгендиле, КъМР-ни бюджети къалай толтурулгъанына, миллет проектлеге бла целевой программалагъа бёлюннген ахча къалай къоратылгъанына къаралгъанды.
КъМР-ни экономиканы айнытыу министрини къуллугъун толтургъан Рахайланы Борис билдиргеннге кёре, жылны башындан бери промышленный производствону индекси 103,7 процентге, эл мюлк продукцияны ёлчеми 103,2 процентге неда 31,8 миллиард сомгъа жетгендиле. Баш капиталгъа салыннган инвестицияла 12 миллиард 790 миллион сомгъа дери кёбейгендиле эмда былтырны кёрюмдюлеринден 14,8 процентге аслам болгъандыла.
Къабарты-Малкъарны бирикдирилген бюджетини файдасы 28 миллиард 12,4 миллион сом, къоранчлары уа 26,2 миллиард сом болгъандыла. Республикалы казнагъа алайлай эмда налогладан бла налогладан тышындан тюшген ахчагъа да отчёт кезиуню ичинде 18,2 эмда 6,8 процент къошулгъанды.
Кенгешде дагъыда «Шахарлада тынчлыкълы халны къурау» федерал проектге кёре районлада бла элледе тапландырыу ишле, муниципал жолланы бузулгъан объектлерини талайына тынгылы ремонт этиу, республиканы районларында культура эм спорт учрежденияланы быйыл тамамларгъа белгиленнген къурулушлары не халда болгъанлары сюзюлгенди. Кюз арты-къыш кезиуге жашау журтла-коммунал мюлк комплекс, социал инфраструктура да къалай хазырланнганларына энчи эс бурулгъанды.
Казбек Коков министрлени кабинетине бла район башчылагъа белгиленнген жумушла къалай тамамлана тургъанларын кюн сайын да тинтирге, билирге буюргъанды. «Республиканы социал-экономика айныуу бла байламлы ишле къалай толтурулгъанларына дайым да кёз-къулакъ болуп турургъа, адамларыбызны тарыгъыуларына, жарсыуларына эс бурургъа, узакъгъа созмай тийишли мадарла да этерге кереклисин унутмагъыз»,-деп чертгенди сёзюню ахырында КъМР-ни Башчысы.