Тюнене Сочиде Къабарты-Малкъарны Башчысы Казбек Коков РФ-ни Федерал Жыйылыууну Федерация Советинде Цифралы экономиканы айнытыу жаны бла советни «Акъыллы шахардан цифралы регионнга» деген ат бла бардырылгъан жыйылыууна къатышханды. Ол «Цифралы келир заманнга къарау» деген 7-чи битеуроссей форумну чеклеринде ётгенди.
Кенгешде медицинагъа бла билим бериуге шёндюгю системаланы, жашау журтла-коммунал комплексге цифралы технологияланы сингдириуге, шахарда жашагъанлагъа тынчлыкълы болумла къурай туруп асламысында ата журтлу телекоммуникация оборудованияны хайырланыугъа энчи эс бурулгъанды.
-Адамла жашагъан тийрелеринде халгъа эс бурадыла, подъездлеринден чыкъсала, арбазларында не бола тургъанын кёрюрге сюедиле. Ол жумушну толусунлай муниципалитетни боюнуна салып къойгъандан а бир тюрлю магъана жокъду. Муниципалитетле ахча бла къалай жалчытылгъанларын биз билебиз. Аны бла ала арбазланы тапландырыу бла байламлы ишни тамамлаяллыкъ тюйюлдюле. Ол сизни бла бизни да борчубузду,-дегенди сенатор Андрей Турчак.
Къабарты-Малкъарда «РФ-ни цифралы экономикасы» деген миллет проектни 6 регион кесеги жашауда бардырылады: «Информация инфраструктура», «Цифралы экономикагъа кадрла», «Информациялы къоркъуусузлукъ», «Цифралы ишни законнга келишдириу», «Цифралы къырал управление», «Цифралы технологияла». Алагъа кёре республикада 172 социал объектни шартланы терк жибериуню сетине къошаргъа, кёрюмдюлени жыйышдырыучу эм айырыучу арала къурауну, ол санда тау жерледе, электроэнергия бла кюн электростанцияланы болушлукълары бла жалчытыргъа, сабийлеге цифралы билим бериу жаны бла комплексле ачаргъа, «Активный гражданин» сервисни кийирирге, пассажир транспортха автоматизацияланнган контроль бардырыргъа эмда башха мадарла этерге белгиленеди.