Тюнене Россейни Президенти Владимир Путин Пятигорскда «Машук-2018» Шимал-Кавказ жаш тёлю билим бериу форумгъа къатышханла бла тюбешгенди. Къырал башчы бу даражалы жыйылыугъа хазырланнган проектле бла шагъырей болгъанды, волонтёрлукъ - жаш тёлю бла ишлеуню магъаналы кесеги болгъанлай къалгъанын чертгенди.
Президент лагерь бла шагъырейлеуюн кёрмючден башлагъанды. Биринчи ол Чеченни чатырына баргъанды. Анда уа республиканы келечилери санларындан къыяулу сабийлеге болушлукъ этиуню амалларыны юсюнден проектлерин къорууларгъа хазырланнганларын билдиргендиле. Ингушлула уа къалгъан-къулгъан затланы экинчи да хайырланыуну къолгъа алгъандыла. Дюгерли къоншуларыбыз а тукъум къалаланы жангыртыргъа айтадыла.
Къабарты-Малкъардан форумгъа кесини социал проектин Радима Кушхова хазырлагъанды. Ол ары тиширыула тойгъа кийген миллет жыйрыкъланы, жаулукъланы элтгенди. Аланы кеси тигеди эмда омакъландырады. Владимир Путин аны къатына келгенде, ол проектини юсюнден тынгылы хапар айтханды. «Мен ата-бабаларыбызны ахшы адет-тёрелери унутулмазча этерге сюеме. Бурун заманлада бизни ынналарыбыз кийген жыйрыкъланы жангыртыу эмда алагъа накъышла салыу бла кюрешеме. Бюгюнлюкге студия мастерскоюбуз да барды. Ары къызчыкъла кёп санда бек сюйюп жюрюйдюле, алтын, кюмюш халыла, минчакъла бла да оюула салыргъа юйренедиле»,-дегенди хунерли къыз.
Анга тынгылап, Владимир Путин тиширыу кийимлени тийип кёргенди эмда кёп затны билирге сюйгенди. Радима уа, къырал башчыны сорууларына жууапла бергенден сора анга «Машук-2018» деген уллу суратны саугъалагъанды.
Владимир Путин лагерьде болгъан башха чатырлагъа да кирип, алада экспонатла бла шагъырейленнгенди. «Жигитлени юсюнден» дегенде ол иги кесек мычыгъанды. «Быллай проектле бусагъатдагъы заманда бютюн бек керекдиле. Ёсюп келгенле ётгюр жерлешлерибизни билселе, аладан юлгю алмай къоярыкъ тюйюлдюле. Хар бирибизни гитче ата журтубузну, битеу деменгили Россейни да кючю ма андады»,- деп чертгенди ол.
Алайда Президентге Россейни жигитлерини эмда къыралны тарыхыны юсюнден фильмле бла кассетаны бергендиле. Аладан бири иймам Шамильни жашы Джамалуддиннге жораланады. Ол Николай Биринчи патчахны къатында ёсюп, экинчи пажеский корпусда окъугъанды. Ма ол шарт артда Россейни бла Шимал Кавказны бирикдирирге кёллендиргенди.
Къырал башчы дагъыда «Бизни заманны жигитлери», «Батырла бизни арабызда» деген эм башха проектлеге, «Россейни гитче жигитлери» деген сурат кёрмючге да эс бургъанды. Алайда окъуна Алана Цховребова Путинни батырлыкъ этген эки сабий бла танышдыргъанды. Къызчыкъ от тюшген юйден бир баланы чыгъаргъанды, жашчыгъ а Терк сууда бата тургъан тенгин къутхаргъанды. Путин, аланы къолларын тутуп, кесине къысып къучакълагъанды.
Алайдан Владимир Владимирович, талада уллу сахнаны къатына барып, ары кётюрюлгенди. Алайда аны сакълап тургъан жаш адамла анга къарсла бла тюбегендиле.
-Сизничала бла тюбешгеним сайын мени не зат сейирсиндиреди десегиз - тутхан ишигизге битеу бош заманыгъызны, бирде уа саулай жашауугъузну окъуна жоралагъаныгъыз, ахча къайгъылы болмагъаныгъыз, адамлагъа болушургъа итиннгенигиз. Ол а жюрек халаллыкъ бла байламлыды. Айтып къояйым,волонтёрланы ишлери хайырлыды бир-бир бюрократ къуллукъчуладан эсе,-дегенди къыралны оноучусу.
Ол Кавказда жандауурлукъ адамгъа анасыны сютю бла сингенин да чертип айтханды. «Шуёхлукъ, къартха намыс этиу, къарыусузгъа жан аурутуу да анда къан бла бериледи. Аны айта келгеним, мында проектлени бек жаратханма. Къабарты-Малкъарда миллет кийимлени жангыртыу, Шимал Осетия-Аланияда тукъум къалаланы тап халгъа келтириу, Чеченде сакъатлагъа болушуу, Дагъыстанда экологияны таза тутуу – бирин айт да, бирин къой. Ала барысы да бек керекли жумушладыла. Сау болугъуз!»,-дегенди.
Сёзюню ахырында Президент машукчулагъа жюрек ыразылыгъын билдиргенди. Андан сора ол жаш адамла тургъан чатырлагъа кирип къарагъанды, спорт майданнга да кёз жетдиргенди, форумчула бла бирге суратха да тюшгенди.
