Россельхознадзорну Шимал Кавказда регионла аралы управлениясында юй къанатлыла жукъгъан грипп аурууну (кесеклени) профилактика жорукъларыны, тинтиуню, жайылыууна чек салыуну юслеринден айтхандыла.

Юй къанатлылагъа бек жукъгъан кесекле (ВГП) – вирус аурууду, къан тамырланы, солуу органланы, аш орунну, нерва эмда жумуртха къурау системаланы ишлерин бузады. Тауукъла эмда башха къанатлыла анга жукъгъанларын ма бу ышанла кёргюзтедиле: мугурайыу, ашдан бла суудан къачыу, тюклери кирпилениу, терилери кёксюлдюм болуу эмда сууланыу, тери тюбюнде къан тамырлары атылыу, ётюу, синусит, ринит, конъюнктивит. Вакцинация этилгенден  сора кийик къанатлылада бу ауруу аллай ышанла болмай ётерге да боллукъду.

Кесеклени инкубация (айныу) кезиую 1-21 кюн бла чекленеди.

Ауруу кёп затла бла кёчерге боллукъду, ол санда  мешхут, аш, суу, ишчилени юс эмда аякъ кийимлери, салам, улоуланы чархлары бла.

Къанатлыла жукъгъан кесекле мюлкледе жайылмаз ючюн  аланы иелери ма бу жумушланы этерге борчлудула:

- къырал ветеринария службаны келечилери келселе, къанатлылагъа къараргъа къояргъа;

- ауруу чыкъгъаныны неда къанатлыланы халлери осалына тюрленнгенини юсюнден службагъа бир суткадан кеч къалмай билдирирге;

- ауругъан къанатлыланы, къырылгъанланы мыллыкларын да сауладан иги да узакъда тутаргъа;

- службаны профилактика, диагностика, чек салыу, карантин кийириу буйрукъларын жик-жиги бла толтурургъа;

- юй къанатлыла кечиннген орунлагъа кийик къанатлыла, гылыула киралмазча этерге.

ВГП къозгъалгъан болур деп ишекли болгъанда, къанатлыланы иелери бу затланы этерге борчлудула:

- къырал ветеринария службаны келечилерине къанатлыладан пробала алып, лабораториягъа жиберирге болушургъа;

- службаны адамына мюлкде неллай бир къанатлы болгъанын, ахыр юч ыйыкъны ичинде ненчасы къырылгъанын айтыргъа.

Кесеклеге диагностиканы эсеплери ачыкъ болгъунчу, къанатлыланы иелерини борчлары:

- къанатлыланы союуну, аланы эмда жумуртхаларын, ашларын, оборудованияны, башха затланы, мешхутну тышына ташыуну тыяргъа;

- къанатлыланы башха жерлеге кёчюрюуню тохтатыргъа;

- ауругъан болурла деген къанатлыла берген жумуртхаланы, аланы этлерин да энчи отоуда тутаргъа;

- къанатлыланы тышына чыгъармай тутаргъа;

- ауругъан болурла деп ишекликге тюшген къанатлылагъа къарагъан ишчиле башха къанатлыланы  къырмазча этерге;

- ишчилени юс эмда аякъ кийимлерини дезинфекциясын этерге;

- мюлкде битеу орунлада эмда андан тышына чыкъгъан улоуланы дезинфекциясын этерге.

Къанатлылагъа кесекле жукъгъандыла деп ишекли болсагъыз, мычымай Къабарты-Малкъар Республиканы къырал ветеринария службасына бла Россельхознадзорну Шимал Кавказда регионла аралы управлениясына билдиригиз. Сорууугъуз бар эсе,  Россельхознадзоргъа барыгъыз неда сёлешигиз. Аны адреси эмда телефон номери: Нальчик, Ленин атлы проспект, 54, 8(8662)77-81-94.

Улбашланы Мурат.