Бу кюнледе Нальчик шахарда биринчи номерли интернатны окъуучулары «Заман» газетни редакциясына  устазлары, аналары бла бирге келгендиле. Редакцияны ишчилери сабийлеге журналистни ишини юсюнден тынгылы хапар айтхандыла. 

Бизге къонакъгъа келген окъуучула  бир-эки жылдан усталыкъ сайларгъа керекдиле. Бусагъатда сабийле жаланда бийик билим алыргъа итиниу бла чекленмейдиле, артда иш табыллыкъмыды, башларын кечиндираллыкъмыдыла – аны да сюзедиле.  Интернатны устазлары Чочайланы Аслижан Алимовна бла Глашланы Джамиля Магометовна профориентация ишни чеклеринде школчуланы  журналистни иши бла  тюзюнлей редакцияда шагъырей этерге сюйгендиле.  Экскурсияны  Байсыланы Марзият бардыргъанды. Биринчи кабинетде школчула журналистле Курданланы Сюлемен эм Улбашланы Мурат бла танышхандыла. 

Школчула бизни ишибизни юсюнден хар затны да билирге сюе эдиле. Эллеге барып, командировкалада кёп сейирлик адамла бла танышханыбызны айтханбыз алагъа. Газет халкъны бирлешдирген кючдю. Журналистле ашыкъмай, хар адамыбызны не фахмусу болгъанын, не жумушну тындыргъанын билдиредиле, бир алим диссертациясын къоруулагъанлай, аны юсюнден биз жазабыз, сабийлени футбол ойнаргъа, сурат этерге, музыка инструментледе согъаргъа юйретгенле эм башхала, не аз да жамауатха хайыр келтиргенле – бизни жигитлерибиздиле.  Журналистика хар адамны багъалай билирге  юйретеди. Эсибиздеди, совет жыллада газетлени биринчи бетлеринде сабанлада уруннганланы уллу портретлери  чыгъыучу эдиле. Жерибизни хайырлана билгенле, тирлик ёсдюргенле, малчылыкъ бла кюрешгенле, эллени  айнытханла – бу адамла битеу Россейде да, бизни республикада да бек сыйлыладыла. Журналистни борчу – ол адамла бла сёлеше билиудю. Ол а тынч тюйюлдю. Статьяны тап къурагъан да тынч тюйюлдю,  ол кеси бир илмуду. Сабийле бу затлагъа эс бургъандыла. 

Усталыкъ сайлау – ол жюрекни ауазын эшите билиудю. Сёз ючюн, битеу да шахар таныгъан чурукъчула бардыла, ала медицина факультетге окъургъа бармагъанлары къууандыргъан шартды. Хар инсан кесини энчи жолун излерге керекди. Фахмусуна, хунерине кёре. 

Школчула Таппасханланы Аминатны  бла Кульчаланы Зульфияны кабинетинде да болгъандыла. Анда хапар журналистни иши статьяла жазгъан бла чекленмегенини юсюнден баргъанды. Сёз ючюн, Таппасханланы Аминат   битеу жамауат ишчиле бла шагъырейди, кёп магъаналы ишлеге къатышады. Керти журналист газетни жамауат бла байламлыгъын кючлендиреди. Кульчаланы Зульфия уа асламысында  спортну юсюнден жазады, аны материалларына кёре бизни халкъыбызда спорт къалай

айныгъаны ачыкъ кёргюзтюледи, Аллах айтса, фахмулу къызыбызны китабы да басмаланыр деп ийнанабыз. Ол келлик тёлюлеге бек сейир боллугъу баямды. 
Ызы бла къонакъларыбыз газетни баш редакторуну орунбасары Жангуразланы Нажабат бла ушакъ этгендиле. Ала газетде ишлер ючюн къаллай билим алыргъа кереклисин да соргъандыла. Бусагъатда законнга кёре, журналистика  эм филология факультетни бошагъанла газетледе ишлерге эркиндиле. Алай медицина неда эл мюлк  бла байламлы билимлери болгъан белгили журналистле да аз тюйюлдюле. Журналистни аты бар эсе, халкъ аны таный, биле эсе, жазгъанын окъуй эсе, аны не дипломлары болгъанын тинтирик  тюйюлдюле. Бусагъатда бир-бир блогерлени окъуучуларыны саны миллионла бла саналадыла, ала да жыйырма биринчи ёмюрде журналистиканы бек магъаналы кесегидиле. 

Ушакъ баргъан кезиуде Жангуразланы Нажабат сабийлени китапланы кёп окъургъа чакъыргъанды. Нек дегенде журналистге сёз байлыкъ керекди. Кесини энчи тили, ызы, хаты болса, аны биринчи айтымындан окъуна танырыкъдыла. Жарсыугъа, бусагъатда  школчула заманларыны асламысын телефонларында оздурадыла. Пушкинни, Толстойну, Достоевскийни, Есенинни окъугъанла, билгенле аздыла. «Алай россей, битеудуния адабиятны билгенден сора да, кесибизни жазыучуларыбызны китапларын да окъугъуз! Мечиланы Кязим, Къулийланы Къайсын, Тёппеланы Алим, Толгъурланы Зейтун, Зумакъулланы Танзиля эм башха фахмулу жазыучуларыбыз – ала бизни тилибизни айнытхандыла. Алай жазыучула да окъуучула болгъан жерде тууадыла. Ана тил – саугъады, башха тиллени билгенибиз аламатды, алай кесибизни ёз тилибизни багъалайыкъ, тинтейик, окъуюкъ», – дегенди Жангуразланы Нажабат. 

«Заман» газетни баш редактору Къонакъланы Хасан шёндюгю дунияда журналистиканы магъанасы ёсюп баргъанын чертгенди. Биз социальный сетьледе, сайтлада окъуучула  кеслерини оюмларын айтханларын кёребиз. Эрттегили ныгъышладача, даулашла, сюзюуле барадыла. Аланы къурагъанла уа журналистледиле.

Экскурсияны ахырында сабийле  компьютер цехге баргъандыла, анда вёрстканы этген Уяналаны Люаза  бла танышхандыла.  «Заман» газетни сыфатын къурагъан ишчилерибизни фахмулары окъуучуларыбызны кюн сайын къууандырады. 

Къонакъларыбыз редакциягъа жюрек ыразылыкъларын билдиргендиле, энтта да «Заман» газетге келликлерин, бизни бла байламлыкъларын юзмезликлерин, бу усталыкъны сайлауну юсюнден сагъыш этериклерин билдиргендиле. 

Къапланланы Марзият.