Республикэм и ЩIалэ­гъуалэ центрым щагъэлъагъуэ «Корни и крылья» выставкэр. Ар къызэригъэпэщащ КъБР-м ЩIалэгъуалэм я IуэхухэмкIэ и министерствэм.

Гъэлъэгъуэныгъэм ха­гъэхьащ Ету зэшыпхъухэу Илонэрэ Элинэрэ я лэжьыгъэ 30-м щIигъу. Сурэтхэм къыщыгъэлэгъуа теплъэ­гъуэхэм блэкIамрэ нобэмрэ зэпащIэ. 
КъБР-м щIалэгъуалэм я IуэхухэмкIэ и министрым и къуэдзэ Ахъмэт Артур Ету зэшыпхъухэм дяпэкIи щIыналъэм исхэр я Iэдакъэ­щIэкI­хэмкIэ ягъэгуфIэну ехъуэ­хъуащ. Абы къыхигъэщащ зэшыпхъухэм я сурэтхэмкIэ я зэфIэкIыр, я лъэп­къым и тхыдэр къызэрагъэ­лъагъуэм къыдэкIуэу, ­щIэб­лэм щэнхабзэмрэ гъуа­з­джэмрэ щаIэ ехъулIэныгъэхэм зрагъэужьынымкIэ щапхъэ зэрахуэхъур. 
- Зэшыпхъухэм фи Iуэхур фIы дыдэу къывохъулIэ. Фи лэжьыгъэхэр щыплъагъукIэ, лъэпкъ щэнхабзэмрэ хабзэмрэ нэхъри уримыгуш­хуэнкIэ Iэмал иIэкъым! Гъуа­з­джэм и IэмалхэмкIэ фи гурыгъу-гурыщIэхэр къы­зэрывгъэлъэгъуэфыр уасэ­ншэщ! Ар зэфIэкI фызэри­Iэм и щыхьэтщ. ЩIалэ­гъуа­лэми нэхъыжьыIуэхэми яфIэ­гъэщIэгъуэнщ фи лэ­жьыгъэхэри, дяпэкIи ехъу­лIэныгъэхэр фиIэну сынывохъуэхъу! - жиIащ КъБР-м и СурэтыщIхэм я зэгухьэныгъэм и унафэщI Къаныкъуэ Жаннэ.
Ету Элинэ жиIащ хуабагъ зыщIэлъ я сурэтхэмкIэ щы­IэкIэ-псэукIэм епха Iуэху зэIумыбзхэм гу лърагъэтэну, блэкIа зэманым щыIа ­лъапIэныгъэхэм, нэхъапэм цIыхугъэ нэхъ яхэлъу, зыр адрейм дэIэпыкъуу, жьы ­хъуахэм пщIэрэ гулъытэрэ хуащIу зэрыщытам къра­гъэгъэзэжыну зэрыщыгугъыр. 
Ету зэшыпхъухэм Налшык и Художественнэ школыр къаухауэ КъБКъУ-м ДизайнымкIэ и колледжым що­джэ. Ахэр зэпеуэ, гъэлъэ­гъуэныгъэ куэдым я лау­реатщ. Нэгъабэ я лэжьыгъэхэр япэу щагъэлъэгъуащ «Сердце Кавказа» выставкэм. Ило­нэрэ Элинэрэ ­КъБР-м ЩIалэгъуалэм я IуэхухэмкIэ и министерствэм и лIыкIуэхэм фIыщIэ хуа­щIа­щ гъэлъэ­гъуэ­ныгъэр къ­ы­­зэрагъэпэ­щынымкIэ къа­зэ­рыдэIэпыкъуам папщIэ.
Зэшыпхъухэм я IэрыкIхэм феплъыфынущ гъатхэпэм и кIэ пщIондэ. 

ТЕКIУЖЬ Заретэ.