Быйыл Къабарты-Малкъарда "Иги шахар болум къурау"  федерал  проектни чеклеринде эки узакъ  элде жамауат тийрелени жангыртырыкъдыла.

Алай бла кюн жылыннганлай   Каменномостское бла  Малка эллени    Ленин атлы ара орамларында   скверни бла   майданны тапландырлыкъдыла. 

Былтыр сагъынылгъан программаны чеклеринде Хабазда жангы сквер ишленнгенди,  Залукодесде бла  Шордаковода да   паркланы айбатландыргъандыла. 

 - Ишлени кезиуюнде  тротуар  плитка жасалгъанды, чыпынлы чыракъла, шинтикле, кир-кипчик атарча орунла салыннгандыла эм тёгерек - башны жашиллендирирча мадар этилгенди, деп билдиргендиле ишле тамамланнган  эллени администрацияларында.

Сагъынылгъан объектле эллеге болмагъанча магъаналыдыла.  Жай ингирледе сабийлери бла солургъа иги кесек ана чыгъады, андан сора да, мында тюбеширге, хапарлашыргъа да   кёпле сюедиле.