«Кавказны накъышы» бешинчи круиз поезд 26 апрельде жангыдан жолгъа чыгъарыкъды, бу башламчылыкъ жашауда бардырылгъанлы, республикабыз бла 10 мингден аслам турист шагъырейленнгендиле.
Поезд жолгъа Москвадан чыгъарыкъды, бу шахарлагъа къайтырыкъды: Воронеж - Дондагъы Ростов - Майкоп, Владикавказ - Грозный - Дербент - Махачкъала - Нальчик, сора артха кетерикди. Къабарты-Малкъаргъа ол 1 майда жетерикди, жолоучулукъ битеу да 7 кюн боллукъду. 8 майда уа аны бла Урал эм Приволжье регионлада жашагъанла хайырланаллыкъдыла, аланы жоллары бу шахарла бла ётерикди: Тюмень - Екатеринбург - Челябинск - Самара - Черкесск - Нальчик - Грозный - Дербент. Сибирь жанында жашагъанланы жолоучулукълары узунуракъ боллукъду - 10 кюн. 
Къабарты-Малкъарны Курортла эм туризм министерствосундан айтханларына кёре, поездни низамы адамлагъа таплыкъгъа кече ала жолда болурча, кюндюз а келген шахарларына къарарча жарашдырылгъанды. Бу жыл дагъыда бир жангычылыкъ этилгенди - къонакълагъа поезд къайтхан шахарлада машиналада экскурсияла къураллыкъдыла алада, квадроциклледе айланыргъа, канат жолла бла бийикликлеге кётюрюлюрге жарарыкъды. Республикабызгъа келгенлеге вокзалда тюберикдиле, регионну ариу жерлерин, Минги тауну да кёргюзтюрюкдюле, миллет ашарыкъла бла сыйларыкъдыла. Быйыл поезд жолгъа ахыр кере 5 сентябрьде чыгъарыкъды.