Быйыл Къабарты-Малкъарда комплекс халда кадастр ишле бардырыллыкъдыла. Регионну Экономиканы айнытыу министерствосундан билдиргенлерине кёре, ары тёрт жюз квартал киреди. Ишлени Роскадастрны бизни республикада бёлюмю тамамларыкъды, ахчаны уа къыралны бюджетинден жиберликдиле.

Россейде 2025 жылны аллында къабыл этилген закон бла, энди комплекс халда бардырылгъан кадастр ишлени юч тюрлюсю барды. Ахча къайдан берилгеннге кёре ала: федерал, регион эмда жер-жерли даражалыдыла. Биринчилерин сагъынылгъан къырал учреждение этериги закон бла энчи белгиленеди.

Быллай ишлени кезиуюнде участкаланы, мекямланы, къурулушлары бошалмагъан объектлени тургъан жерлери эмда чеклери тохташдырыладыла, реестрде табылгъан халатла тюзетиледиле, межевой проектлери болгъан тийреледе участкала къураладыла. «Бирде ала жерлени чеклери бла байламлы даулашланы тыяргъа да себеплик этедиле. Бир игиси, адамла аны ючюн абери тёлерик тюйюлдюле, хар нени да къырал этерикди», - дегенди Роскадастрны Къабарты-Малкъарда бёлюмюню башчысыны къуллугъун толтургъан Юлия Лигидова.

Алай бла быйыл бу ведомство битеу да 17579 участканы эмда 46382 объектни чеклерин тохташдырыргъа керекди. анда шёндю ишге хазырланып башлагъандыла, битеу керек материалланы жыйышдырылгъандыла, объектлени тизмеси да тохташдырылгъанды. Дыгъыда Росреестрни Управлениясына, Жер эмда ырысхы бла байламлы халланы министерствосуна, жер-жерли самоуправление органлагъа билдириуле жиберилгендиле, ала ведомствону сайтында да басмаланнгандыла. Жууукъ кезиуде уа ишле бардырыллыкъ объектлени иелерине да билдирирге дейдиле аны юсюнден.

Роскадастрны келечиси Батчаланы Хаджи-Мурат айтханнга кёре, аланы электрон халда жиберликдиле. Аны себепли иелени адреслери тюз болуруну магъанасы уллуду. Аны билир ючюн а МФЦ-гъа барыргъа керекди; бу жумуш кеси да хакъсыз бериледи.

Комплекс халда бардырыллыкъ кадастр ишлени кезиуюнде, сагъынылгъан объектлени эмда жеринден тепдирилмеген мюлклени иелеринден тири, ачыкъ болурларын сакълайдыла Росреестрде. Башхача атханда, ала ведомствогъа электрон почталарын, сора объектлерини къагъытларыны (ала ЕГРН-де жокъ эселе) копияларын билдирселе эм берселе игиди. Анга кадастр ишле башланнгынчы дери 30 кюн бериледи. Ишни кезиуюнде уа специалистлеге онг берирге керекди эмда тыйгъыч салыргъа жарарыкъ тюйюлдю.

Улбашланы Мурат.