Къабарты-Малкъар къырал университетде малкъар халкъ туугъан жеринден зор бла кёчюрюлген кюннге жораланнган эсгериу ингир бардырылгъанды. Аны окъуу юйню Малкъар маданиятны Отарланы Керим атлы арасы къурагъанды. Анга  вузну ректоруну къуллугъун толтургъан  Юрий Альтудов, поэтле Беппайланы Муталип, Мусукаланы Сакинат, Аппайланы Лариса, «Нюр» эм «Минги-Тау» журналланы баш редакторлары Сабанчыланы Арипа бла Додуланы Аскер, Филология институтну къарачай-малкъар тилни кафедрасыны таматасы Кетенчиланы Мусса, журналистле,  дагъыда башхала чакъырылгъан эдиле. 

Ингирни бардыргъанла малкъар халкъны тарыхында бушуулу кезиуню  юсюнден къысха билдириу  этгендиле эмда быллай шартла келтиргендиле: сюргюннге 37 минг чакълы таулу  ашырылгъан эди. Он мингден артыкъ эр киши уа ол кезиуде Уллу Ата журт урушну аулакъларында немисли ууучлаучуладан къыралны азатлау сермешлеге къатышхандыла. Сагъышландыргъан тарихледе энчи тохтап, Юрий Альтудов кесини оюмун айтханды.

- Сабийлени, тиширыуланы бла къартланы аллай къыйынлыкъгъа къоюу болмагъанча уллу кюйсюзлюк эди. Алай малкъар халкъ,  энчилигин тас этмей, къадары берген сынамдан бет жарыкълы чыкъгъанды. Туугъан жерине  къайтхандан сора республикада жашагъан башха миллетле бла Къабарты-Малкъарны айнытыугъа уллу къошумчулукъ этгенди. Энди бир миллет, бир адам да аллай терсликни сынамасынла, - дегенди ол.

Ызы бла уа сахнагъа «Эрирей» халкъ ансамбль чыгъып, кёчгюнчюлюкге аталгъан жырларындан бирин жырлагъанды. 

Беппайланы Муталип бла Додуланы Аскер а кеслерини кёчгюнчюлюкге жораланнган чыгъармаларын малкъар эм орус тилледе айтхандыла. 

Малкъар халкъны бушуу кюнюне аталгъан ингирге Къабарты маданиятны  арасыны келечилери да къатышхандыла. Аны келечиси Амир Кулов халкъла бюгюнлюкде бир бирни ангылап, шуёхлукъда жашагъанларын энчи белгилегенди.

Малкъар маданиятны Отарланы Керим атлы арасыны таматасы Байтуугъанланы Исмайыл а,  къонакълагъа ыразылыгъын билдирип, миллетибизни энди быллай кюнлери болмасынла, деп  тежегенди. 

Ингир Габитланы Абдулну «Малкъар таулула» деген  жыры бла бошалгъанды. 

Таппасханланы Аминат.