Урысей Федерацэм «Физическэ культурэмрэ спортымрэ зегъэужьын» и къэрал программэм, «Спортыр гъащIэм и мардэщ» федеральнэ пэхуэщIэм хыхьэ «Демография», «Бизнес - спринт: спортыр къыхы-зох!» лъэпкъ пэхуэщIэхэм, «Къэбэрдей-Балъкъэрым физическэ щэнхабзэмрэ спортымрэ зыщегъэужьын» къэрал программэм япкъ иткIэ республикэм а къалэнхэр зэфIэгъэкIыным хуэщIа ухуэныгъэхэр жыджэру щрагъэкIуэкI иужьрей илъэсхэм.
Къэбэрдей-Балъкъэрым СпортымкIэ и министерствэм иджыблагъэ къызэритамкIэ, дызэрыт илъэсым мы гъэм Хъущтэ-Сырт къуажэм спорт утыку «губзыгъэ» щаухуэ- нущ (интернетым зыпыпщIэу спорт Iэмэпсымэхэр къэбгъэсэбэп, абыхэмкIэ зрибгъасэ, уриджэгу хъууэ), Зеикъуэ къуажэмрэ Хьэбэзрэ щаухуэнущ ГТО-м и мардэхэр тыным зыщыхуагъэхьэзыр щIыпIэхэр.
ПсынщIэу зэпкърыплъхьэ-зэпкърыпхыж, нэгъуэщI щIыпIэхэм бгъэIэпхъуэ хъухэм хуэдэ спорт зал Хьэсэней къуажэм щагъэувынущ. Абы нэмыщI, Налшык къалэм дэт «Налшык» спорт комплексыр къызыхуэтыншэу мы гъэм зэрагъэпэщыжынущ.
ЕтIанэгъэ, республикэм и щIыналъэхэм къата лъэIу-хэм япкъ иткIэ, абыхэм иджыпсту щыIэхэм къадэкIуэу, спорт площадкэу 3 щаухуэнущ, 2027 гъэм - иджыри 2. Абыхэм нэмыщI, 2026 гъэм Зэрэгъыжрэ Безенги къуажэмрэ спорт залхэр щаIэтынущ.
2027 гъэм Налшык къалэм къыщызэIуахынущ щIымахуэ спорт лIэужьыгъуэхэм зыщыхуагъэсэным хуэщIа, IэрыщI мыл зэрылъ, узыншагъэр щызэтрагъэувэж-физкультурэ спорт комплексыщIэрэ Олимп джэгухэм хэтыфынухэр, зэчиифIэхэр боксым щыхуагъасэ спорт ухуэныгъэрэ.
2019 гъэм къыщыщIэдзауэ Къэбэрдей-Балъкъэрым щаухуащ спорт ухуэныгъэу 68-рэ, абы щыщу 10-р спорт комплексхэмрэ физкультурэ-узыншагъэр щызэтрагъэу-вэж ухуэныгъэхэмрэщ, 58-р - спорт утыку зэIухахэрщ. Иджы ягъэзащIэ пэхуэщIэхэм япкъ иткIэ яухуахэм ящыщу нэхъ ину абыхэм яхэтыр тхьэмахуитI ипэкIэ Налшык къалэм къыщызэIуаха иджырей пятиборьем щыхуагъасэ спорт комплексымрэ IэрыщI мыл зэрылъ уардэунэмрэщ.
Апхуэдэуи, республикэм и языныкъуэ жылэхэм къыщызэIуахащ спорт Iэмэпсымэ зэхуэмыдэхэмкIэ къызэгъэпэща утыкуу 34-рэ, ФОК-хэм хыхьэу IэрыщI алэрыбгъу зэрылъ топджэгу губгъуэу 4, ГТО-м и мардэхэр щагъэзащIэ спорт утыкуу 12, спорт утыку «губзыгъэу» 4.
«Физическэ щэнхабзэмрэ спортымрэ зегъэужьын» къэрал программэм ипкъ иткIэ 2030 гъэм ирихьэлIэу Уры- сей Федерацэм спорт ухуэныгъэ куэд къыщызэIуахынущ. Абы хэтынущ спорт утыку къызэрыгуэкIхэри ухуэныгъэ ехьэжьахэри. ЖыпIэнурамэ, спорт ухуэныгъэ ехьэжьауэ 150-рэ, иджырей спорт утыкуу 637-рэ, спорт утыку къызэрыгуэкIыу 1078-рэ, зэпкърыплъхьэ-зэпкърыпх хъу модульнэ залхэм хуэдэу 86-рэ, бассейнхэр, IэрыщI мыл зэрылъ утыкухэр хэтщ абыхэм.
«Физическэ щэнхабзэмрэ спортымрэ зегъэужьын» къэрал программэр зэрагъэзащIэм теухуауэ УФ-м и Пра- вительствэм и комиссэм иджыблагъэ иригъэкIуэкIа зэIущIэм ар щыжиIащ вице-премьер Чернышенкэ Дмитрий.
УФ-м спортымкIэ и министр Дегтярёв Михаил абы къыщыхигъэщащ къапэщылъ лэжьыгъэхэм щынэхъыщхьэнур унафэхэм япкъ иткIэ спорт ухуэныгъэхэр зэращIынум и закъуэкъым, атIэ цIыхухэм ахэр къазэрыхуэщхьэпэнум-рэ абыхэм ехьэлIауэ къагъэлъэгъуэну арэзыныгъэмрэ зыхуэдэнурщ Iуэхур зытращIыхьынур.
ХЬЭЩЫКЪУЕЙ Олег.
