Налшык къалэм дэт «Налшык-Аренэ» IэрыщI мыл зэрылъ уардэунэм гъатхэпэм и 4 - 5-хэм зыкъыщигъэлъэгъуэнущ Омск областым лъэрыжэм тету къэфэнымкIэ и командэ къыхэхам. Абы­хэм я мастер-клас­с­хэм­рэ хэгъэрейхэм щхьэкIэ зэхагъэува программэмрэ еп­лъыну гукъыдэж зиIэхэр а махуитIми фрагъэблагъэ сы­­хьэтхэр 15-мрэ, 19-мрэ.

«IэрыщI мыл зэрылъ ди уардэунэм къедгъэблэгъащ Омск областым лъэрыжэм тету къэфэнымкIэ и командэ къыхэхар. Мастер-классхэр, лъэрыжэм и щэхухэр ягъэлъэгъуэнущ урысейпсо зэхьэзэхуэхэм, Урысейм и Гран-при зэпеуэхэм щытекIуахэмрэ къы­щыхэжаныкIахэмрэ. Ап­хуэ­­дэуи а спорт лIэужьыгъуэм дихьэх ди цIыхухэм Iэмал ­ягъуэтынущ категорие ищхьэ зиIэ тренер, урысейпсо зэхьэзэхуэхэм я судья Басос Анжелэ епсэлъэну, упщIэхэмкIэ зыхуагъэзэну», - жиIащ ­КъБР-м спортымкIэ и ми­нистр Хьэсанэ Ислъам.
Фигу къэдгъэкIыжынщи, тхьэ­махуитI хуэдиз ипэкIэ гуфIэгъуэ зэхыхьэ иращIылIэу Налшык къалэм къыщызэIуахащ IэрыщI мыл зэрылъ «Нал­шык-Аренэ» уардэунэр. Ар республикэм хузэфIэкIащ «Демографие» лъэпкъ пэ­хуэ­щIэм хыхьэ «Спортыр гъащIэм и мардэщ» къэрал программэм и фIыгъэкIэ. Мып­хуэдэ ухуэныгъэр Къэбэрдей-Балъкъэрым щыяпэщ. Лъэрыжэм тету къэфэным, хоккейм, кёрлингым зыхуэбгъэсэн щхьэкIэ узыхуеину Iэмалхэр щыIэщ мыбы. Псори зэхэту уардэунэм иубыдащ метр зэбгъузэнатIэ 4000.
«Налшык-Аренэ» уардэу­нэр Налшык псы Iуфэм къы­Iутщ, «ДыгъафIэ къалэ» сабий академиемрэ «Налшык» спорт комплексымрэ къаб­гъурыту.

КЪАНШЫУЕЙ  Алим.