Нальчикде «Динамо» общество къурап ётдюрген битеуроссей эришиуле башланнгандыла. Бу турнир Ата журтну къоруулаучуну кюнюне бла Уллу Хорламны 80-жыллыгъына жораланып бардырылады. Анга 15-16-жыллыкъ боксчула къатышадыла.

КъМР-де ич ишлени министри, «Динамону» регион бёлюмюню таматасы, полицияны генерал-майору Вячелав Крючков белгилегенича, бу эришиуле жыладан жылгъа кюч ала барадыла.

- Ол бек къууандыргъан шартды. Бу эришиулеге къатышханланы саны  жыл сайын ёсе баргъаны бек къууандырады. Бизни общество спортдан тышында да жаш тёлюбюзню патриот сезимде юйретиуге да энчи магъана береди, - деп чертгенди ол.

Республиканы спорт министрини орунбасары Аналаны Аслан Нальчикде даражалы регион эришиуле аслам бардырылгъанларын белгилеп, «Динамо» да анга къошумчулукъ этгенин билдиргенди.

- Кёп болмай дзюдодан эришиуле ётдюле, бюгюн а биз боксчулагъа къонакъбайлыкъ этебиз. Сейир эм таза тюбешиуле болурларына ийнанама. Кючлю хорласын, - деп чертгенди. КъМР-ни Боксдан Федерациясыны таматасы Гайыланы Рауль.

«Динамо» обществода спортну бу тюлюсюн айнтыугъа энчи эс бёлюннгенини юсюнден Боксну битеуроссей арасыны таматасы, спортну халкъла аралы класслы устасы Дмитрий Дягилев.

- Бизни обществогъа киргенлени ахыр жетишимлерин биз Россейни кубогунда кёрюп къууаннганбыз. 16 ауурлукъ категорияда биз 6-да биринчиле болгъанбыз. Ол дунияны чемпионатына сайлау эришиу эди. Мында да кючлюле кеслерин ачыкъларыкъларына ийнанама, - деп къошханды ол.

Беш кюнню ичинде ётерик эришиулеге Россейни 12 регионундан 170 боксчу къатышадыла. Бизни республикадан анда кеслерин 26 спортчу кёргюзтюрюкдюле. Финал тюбешиуле шабат кюн бардырыллыкъдыла. Алада хорлагъанла къыралны биринчилигинде кеслерин сынаргъа эркинлик аллыкъдыла, деп билдиреди «Динамо» Битуероссей спорт обществону регион бёлюмюню пресс-службасы.

Таппасханланы Аминат.