Къэбэрдей-Балъкъэрым СпортымкIэ и министерствэм иджыб­лагъэ щекIуэкIащ экстремизм, терроризм щIэпхъа­джа­гъэхэм пэщIэтыным ехьэлIа зэIущIэ. 

Зэхуэсым хэтащ КъБР-м и Правительствэм и УнафэщIым и къуэдзэ Къуэшырокъуэ Залым, УФ-м и МВД-м и къудамэу республикэм щыIэм Экстремизмэм пэщIэтынымкIэ и центрым и оперуполномоченнэ Гуслистовэ Викторие, КъБР-м спортымкIэ и министрым и къуэдзэ Хэжь Заур сымэ. ЗэIущIэм кърагъэблэгъащ ди щIыналъэм и спорт еджапIиплIым я унафэщIхэмрэ тренер-егъэджакIуэхэмрэ.
Къызэхуэсахэр тепсэлъыхьащ терроризм, экстремизм щIэпхъаджагъэхэр щIыналъэм къыщымыгъэхъуным, абыхэм япэ­щIэтыным, щIалэгъуалэр а мыхъумыщIагъэхэм щыхъумэным хуэунэтIауэ щыIэ Iэмалхэм, ахэр къызэрыгъэсэбэпыпхъэхэм. Тренерхэм зэIущIэм щыжраIащ я гъэсэнхэр я нэIэ щIагъэтыну, дин, лъэпкъ зэхэгъэжым, зэпэщIэувэныгъэхэм къыхураджэу иужьрей зэманым интернетым къралъхьэ Iуэху мыщхьэпэхэм дамыхьэхыным гулъытэ хуащIыну, къэралым щыщыIэ хабзэхэр къызэпамыудыным, я щхьэ яхъумэжыным хуаущиину. 
ХЬЭЩЫКЪУЕЙ Олег.