Къабарты-Малкъар къырал университетде Ата журтну къоруулаучусуну жылын ачхандыла, ол эсгериу митингден башланнганды.

КъМР-ни Правительствосуну Председателини орунбасары Залим Кашироков, КъМР-ни Миллетлени ишлери эмда жамауат проектле жаны бла министри Анзор  Курашинов, кюч органлада ишлегенле, энчи аскер операциягъа къатышхан ветеранла эм юнармеецле КъМКъУ-ну преподавательлерине бла студетлерине этилген эсгертмеге гюлле салгъандыла.

Андан сора къонакъла «Жигитни бети» кёрмючге баргъандыла, ала анда Къабарты-Малкъардан Уллу Ата журт урушха къатышханланы юслеринден хапарла билгендиле. Бу кёрмючню студентлени сурат клубуну келечилери эм вузну жаш тёлю политика эм юйретиу иш жаны бла управлениясы къурагъанды.

 Ата журтну къоруулаучусуну жылын Ю.Темиркановну атын жюрютген залда ачхандыла. Аны бардыргъанла 1918, 1946 эм 2025 жылланы аскер кийимлерин кийгендиле, аны бла байрамны тарыхын эсге тюшюргендиле. Бу байрам бизни къыралда жюз жылдан аслам белгиленеди.

 КъМКъУ-ну жаш тёлю политика, юйретиу иш эмда социал соруула жаны бла проректору Беслан Назранов университетге келген къонакълагъа алгъыш сёзюн айтханды эм анда Ата журтну къоруулаучусу жылы ачылгъанын билдиргенди.

«Жылны темасы Россейни шёндюгю заманын кёргюзтеди- Ата журтха кертичилик, тёлюден-тёлюге ётген ахшы тёреле, абадан къауумгъа намыс-сый бериу эм Ата журтну къоруулаучуланы даражаларын кётюрюу»,-деп белгилегенди проректор. 
 КъМР-ни Правительствосуну Председателини орунбасары студентлеге байрамны магъанасыны юсюнден айтханды.

 «Ата журтну сейирлерин къолунга сауут алып къоруулагъандан сора да кёп тюрлю амалла бардыла. Къыралгъа къуллукъ этерге башха усталыкъла бла да боллукъду, сиз кесигизге деп сайлагъанладан. Сёз ючюн, энчи аскер операциягъа къатышханлагъа гуманитар болушлукъ тапдырыу, ахшы урунуу да, ол да Ата журтха къуллукъ этиуге саналады»,- деп белгилегенди вице -премьер.

Залим Кашироков фашизмни хорлагъанлагъа эм энчи аскер операциягъа къатышханлагъа ыспас этгенди. Ала бюгюнлюкде Россейни мындан ары мамыр жашауу ючюн кюрешедиле дегенди. Андан сора да, ол жууукъ къыралладан келип окъугъан студентлеге Уллу Ата журт урушда Хорламны битеу совет халкъ биригип болдургъанын билдиргенди эмда аны эсде тутаргъа кереклисин чертгенди.

 КъМКъУ-ну жаш тёлюню инсан-патриот жаны бла юйретиу арасыны таматасы, СВО-ну ветераны, КъМР-ни Парламентини депутаты Герман Шевчук озгъан жылланы тарыхын унутмазгъа чакъыргъанды эмда дуниягъа мамырлыкъ тежегенди.
Андан сора университетни Ю.Темирканов атлы залында «Донбасс. Тюнене, бюгюн, тамбла» деген документли фильмни кёргюзтгендиле. Анда   режиссёр Татьяна Борщ Донбассда украинлы властьланы келечилери бла къаугъа не ючюн башланнганын айтады эм энчи аскер операция ДНР бла ЛНР республикалада бошдан бардырылмагъанын, аны сылтауларын да туура этеди.