Озгъан байрым кюн Элбрус районну Къулийланы Къайсын атлы Маданият юйюнде РФ-ни Жазыучуларыны келечиси, суратчы Сарбашланы Азнорну чыгъармачы ишлерини кёрмючю ачылгъанды. Ол Уллу  Хорламны 80 жыллыгъына бла Ата журтну къаруулаучусуну жылына аталгъанды.

Сарбашланы Азнорну хар иши сюймекликден, тазалыкъдан, ариулукъдан толупдула. Бахсан ауузуну табийгъаты аны ишлеринде энчи ызны тутадыла. Баям, аны ючюн болур, кесин да Элбрус районда сыйлы кёредиле, хурмет этедиле. Анга бу кёрмючню ачылыууна кёп адам келгени да шагъатлыкъ этеди. Аланы араларында абадан тёлю, къартла эм жашла да болгъандыла. Ала искусствону кючюне бла суратчыны  фахмусуна тийишли багъа бере, аны хурметлегендиле. 

Элбрус муниципал районну башчысыны къуллугъун болжаллы халда толтургъан Отарланы Мухтар суратчыны ишлеринде ариулукъгъа, табийгъатха, Ата журтха бла туугъан жерине уллу сюймекликни кёргенин белгилегенди. Хар заманда да районубузда анга къууанып тюбегенлерин да айтханды.

Ызы бла  профессионал суратчы Ёзденланы Мухтар сёлешгенди. Ол Азнорну чыгъармалары бийик багъагъа тийишли болгъанларын, кёплени жюреклерини назик сезимлерин къозгъагъанларын да айырып айтханды.

Россейни Журналистлерини союзуну келечиси, жаш поэт Ёзденланы Женя Азнорну он жылдан бери таныгъанын, алай аны бек биринчи поэтча билгенин айтханды. Фахмулу адамны хар тутхан ызы да жетишимли болгъанын чертгенди. Суратларында деменгили Минги тауну тазалыгъын бла кючюн кёргенин айта, мындан ары да чыгъармачылыкъ жолунда бийик жетишимлеге жетерин тежегенди.          

Азнорну районда сюд приставланы таматасы Курданланы Жансурат бла суратчыны жууугъу Сарбашланы Юсюп да алгъышлагъандыла.

Башында да сагъыннган эдик Сарбаш улуну   тилманчлыкъ ишини юсюнден. Ол кюн аны башха тилледен орус тилге кёчюрюлген ишлерини энчи бир къабыргъада кёре эдик. Керти да бир адамны анча затха сейири болгъаны ёхтемлендиреди. 

Кёрмючню ачылыуу ол кюннге тюшгени бошдан болмагъанды.  Азнор жаш тёлюню юйретиуге, аланы патриот сезимлерин кючлеуге да тийишли эс бурады. Ол Сауутланнган кючлени запасдагъы офицерлерини  «Мегапир» миллет ассоциациаларыны саугъаларына бла махтауларына кёп кере ма аны ючюн тийишли болгъанды.

Сарбашланы Азнор бизни районнга сюймеклигин сёзлери бла угъай, ишлеринде кёргюзтгенди. Келгенлени барына да жюрек ыразылыгъын билдире, быллай огъурлу тюбешиу аны жюрегинде кёп жыллагъа сакъланырын белгилеп айтханды. 

Кёрмюч сау айны ичинде барлыкъды, Элбрус районда жашагъанланы кезиулю фахмулу жашыбызны чыгъармалары бла шагъырейленирге аламат онглары боллукъду.

Темуккуланы Асият.