Россельхознадзорну Шимал Кавказда регионла аралы управлениясы, «ВетИС» къырал системаны тинтген кезиуде, бир энчи предприниматель чыгъаргъан хумзуну ёлчеми, анга къоратылгъан сютге келишмегенин тохташдыргъанды. Анда айтханларына кёре, 78,8 килограмм хумзугъа 800 килограмм ийнек сют кетгенди, деп жазыла эди системада. Алай Росстатны 605 номерли буйругъуна тийишлиликде уа, бир килограмм хумзу этер ючюн, жети литр сют керекди. Аны себепли ол предприниматель къалгъан 205 литр сютню къайры къоратханы белгисизди. Аны ючюн анга эсгертиу этилгенди, бу шартны юсюнден Къабарты-Малкъарны Ветеринария управлениясына да билдириу жиберилгенди.

Тапсыз мирзеу

Управленияда дагъыда мирзеуню таплыгъына кёз-къулакъ боладыла. Росаккредитацияны сайтына къарагъанда, анда Къабарты-Малкъардан декларация жарашдырылгъанын кёргендиле, алай ары дери уа мирзеуню качествосуна тинтиуле толусунлай этилмегенин да тохташдыргъандыла.

Чекленнген жууаплылыгъы болгъан «ССД» биригиу былтыр жыйгъан беш минг тонна нартюххе декларация жарашдыргъанды. Анга кёргюзтген къагъытлада уа тинтиулени бир кесеги жокъ эди. Ол санда ма былагъа: пестицидлеге, жууа уулагъа, заранлы къошакъ затлагъа эмда къурт-къумурсхалагъа. Ол себепден декларацияны болжалын тыяргъа оноу этилгенди, мюлкге уа эсгертиу жиберилгенди.

Улбашланы Мурат.