«Къабарты-Малкъар Республикада терроризмни бла экстремизмни профилактикасын бардырыу» къырал программаны чегинде «Спорт терроргъа къажауду» деген чакъырыу бла киокусинкайдан регионну биринчилиги бардырылгъанды. Аны Къабарты-Малкъарны киокусинкайдан федерациясы бла Спортну Олимпиадагъа кирмеген тюрлюлеринден школу Спорт министерствону себеплиги бла къурагъандыла.

Эришиуню мураты жаш тёлю арада киокусинкайны бла единоборстволаны айнытыу, жаш адамланы бла сабийлени физкультура эм спорт бла кюреширге кёллендириу, аланы Ата журтха сюймекликлерин кючлеу эм террорну ниетлерине алданмазча этиу болгъанды. Сынаулагъа 10-18-жыллыкъ 120-дан аслам адам къатышхандыла, ол санда Къарачай-Черкесден да. Аланы ачылыуларында уа жетишимли болгъан спортчулагъа къууанчлы халда «Спортну устасына кандидат» деген белгилени бергендиле.

Эсеплеге кёре, кеслерини ауурлукъ эм жыл сан къауумларында Къабарты-малкъардан Амирхан Алоев, Чабдарланы Ачемез, Идар Тлимахов бла Аскер Шаов хорлагъандыла. Ала грамотала эм ахча бла саугъаланнгандыла. Саугъалагъа саулай къауумла да тийишли болгъандыла. Алай бла битеукоманда эсепде биринчи жерни «Сатори» алгъанды, аны тренери Насыплыланы Тахирди.

Кульчаланы Зульфия.