КъМР-ни Миллет музейинде «Жигитни атасы» деген кёрмюч ачылгъанды. Анда энчи аскер операциягъа къатышхан эмда ол къазауатда жан берген аскерчилени бла аланы юйретген, ёсдюрген аталаны суратлары, къысха шартла да кёргюзтюлгендиле.
Кёрмюч КъМР-ни Парламентини башламчылыгъы эмда «Ата журтну къоруулаучулары» фондну регион бёлюмюню болушлугъу бла къуралгъанды. Аны ачылыууна СВО-ну ветеранлары, энчи аскер операцияны кезиуюнде жан берген батырланы жууукълары чакъырылгъандыла, законла чыгъарыучу органны депутатлары да келгендиле.
Тюбешиу ёлген аскерчилени хурметине бир минут шумсуз туруу бла башланнганды. Ызы бла Парламентни спикери Татьяна Егорова сёлешгенди. Ол Россейге кесини жалынчакъсызлыгъын къорууларгъа кёп кере тюшгенин айтып, бюгюнлюкде да къыралыбызгъа тюзлюкню, ышаннгылы айныуун сакъларгъа керек болгъанын чертгенди.
- Бу кёрмючню биз магъаналы заманда ачханбыз – Уллу Хорламны 80-жыллыгъы эмда Ата журтну къоруулаучусуну жылы белгиленнген кезиуде. Ол Миллет музейни КъМР-ни Аскер махтаулугъуну залында ачылгъаны тёлюлени араларында байламлыкъ юзюлмезлигини белгисиди,-дегенди спикер.
Татьяна Борисовна СВО-гъа къатышхан аскерчиле туугъан журтларын, сабийлерин, жууукъларын къоруулагъанларын белгилегенди. «Аланы барысын да Ата журтубузгъа сюеймеклик бирикдиреди. Бу сезимни уа юйюрлери, аталары, аналары сингдиргендиле къанларына. Быллай батыр жашланы ёсдюрген ата-аналагъа жюрек ыразылыгъымы билдиреме»,-деп, спикер кёрмючге жаш адамла келип, ала да Ата журтха сюймекликни, анга къуллукъ этиуню тёрелерин андан сора да бардырлыкъларына ышаннганын айтханды.
Парламентни башчысы залда жыйылгъанлагъа жууукъ адамларын тас этгенлери ючюн къайгъы сёз бергенди эмда бюгюн СВО-да болгъан жашларыбызны аналары бла бирге къайгъыргъанын айтханды. «Жашларыбызны жигитликлери ёмюрлеге сакъланырыкъды, алагъа дайым хурмет этилликди. Биз СВО-гъа къатышханлагъа, аланы юйюрлерине болушханлай, къолдан келгенни этгенлей турлукъбуз»,- дегенди Татьяна Егорова. Ол жууукъ кезиуде республиканы уланлары юйлерине Хорлам бла къайтырларын тежегенди.
Ызы бла Татьяна Борисовна энчи аскер операцияны ветеранларына бла СВО-да жан берген жашланы аталарына Парламентни Башчысыны Ыразылыгъыны белгилерин бергенди.
Тюбешиуде КъМР-ни Правительствосуну Председателини орунбасары Залим Кашироков, «Ата журтну къоруулаучулары» фондну регион бёлюмюню таматасы Муаед Дадов, Миллет музейни таматасы Феликс Наков да сёлешгендиле.
Залим Кашироков тюбешиу республиканы аскер махтаулугъуну залында къуралгъаны артыкъда магъаналы болгъанын айтханды. «Ол хорламны тёрелери андан ары бардырылгъанларына шагъатлыкъ этеди»,- деп, ата-аналагъа айланып: «Быллай батыр жашланы ёсдюргенигиз ючюн жюрегимден ыспас этеме. Аланы атлары халкъны эсинде къаллыкъдыла»,-дегенди.
Муаед Дадов а 2025 жыл энчи аскер операцияда Хорламны жылына бурулурун, аскерчи жашларыбыз юйлерине сау-саламат къайтырларын тежегенди.
Ол «Жигитни атасы» проектни башламчысы Россейни Къырал Думасы болгъанын, кёрмюч Миллет музейде бир ай турлугъун билдиргенди. «Республиканы битеу районларындан жаш адамла бери келип, жигитлерибизни кёрлюкдюле. Ызы бла аны фондха кёчюрлюкбюз, ол дайым да ишлерикди эмда аны батыр жашларыбызны суратлары бла энтта кенгертир муратыбыз барды»,-дегенди.
Жыйылыуда энчи аскер операцияда жан берген аскерчилени аталары да сёлешгендиле. Ала республиканы жашлары антларын, аскерчи борчларын ахырына дери толтургъанларын, ата-бабаларыбызны жигит тёрелерине кертичи болгъанларын айтхандыла.
Тикаланы Фатима.
